Trein

'n Trein is 'n voertuig wat op 'n spoor beweeg en uit een of meer trokke of waens bestaan. Treine word gebruik om mense, diere en goedere te vervoer. Die plek waar treine stop, sodat mense kan op- of afklim, word 'n treinstasie genoem. Die eerste trok van die trein is die lokomotief, wat die kragbron bevat en die res van die trein agterna sleep.

Alle treine word beheer deur 'n bestuurder wat die trein moet versnel en rem. Die bestuurder van 'n trein word die masjinis genoem.

Treine word ingedeel volgens aandryfmetode asook waarvoor dit aangewend word:

Goedere- of vragtreine word gebruik om goedere in trokke van een plek na 'n ander te vervoer. As voorbeeld, 'n trein wat steenkool na kragsentrales aanry of na uitvoerhawens vervoer, bv. die Sishen-Saldanha Spoorlyn.

Passasierstreine gebruik spesiale waens eerder as trokke sodat mense gerieflik tussen stasies daarin vervoer kan word. 'n Voorbeeld hiervan is die Gautrein in Suid-Afrika. Op passasierstreine werk daar kondukteurs wat nagaan dat elke passasier oor 'n kaartjie beskik.

Die eerste geslaagde stoomtreindiens is in 1825 in Engeland ingestel. Stoomtreine het 'n stoker aanboord, wat die vuur moet stook om die stoom wat die trein aandryf te lewer. Namate dieseltreine meer gewild geraak het, het stoomtreine in onbruik verval.

Dieseltreine beskik oor dieselenjins met 'n binnebrandmotor wat die dieselsiklus gebruik om die trein vorentoe te beweeg. Die tipe treine word by treinstasies hervul.

Tydens die Sokkerwêreldbeker 2010 het die Suid-Afrikaanse owerhede 190 diesellokomotiewe op bystand gehou ingeval iets fout sou gaan met die elektriese lokomotiewe van Metrorail wat toeskouers rondgekarwei het.^[1]

Die eerste elektriese treine het in die 1800's hul verskyning in Europa en Amerika gemaak en word vandag algemeen gebruik. Treine met elektriese aandrywing het oorhoofse kragdrade oor die spore wat die trein se motors van elektrisiteit voorsien.

Wikimedia Commons bevat media in verband met Trains.

Sien trein in Wiktionary, die vrye woordeboek.

• Spoorvervoer in Suid-Afrika
• Gautrein
• Moltrein
• Treinrampe in Suid-Afrika
• Trem