Boris Palmer

Dr Boris Erasmus Palmer (* 28. Mai 1972 z Woeblenga) isch e dytsche Bolitiker (barteilos, bis 2023: (Bindnis 90/Di Griene). Är isch vu Merz 2001 bis zum Mai 2007 Abgordnete im Landdag vu Bade-Wirttebärg gii. Syt Jänner 2007 isch er Oberburgermaischter vu dr Stadt Dibenga.

Dr Palmer isch z Geradstetten ufgwachsen un isch e Suhn vum Obstbaumkundler Helmut Palmer (1930–2004), wu as barteilose Kandidat bi iber 250 Burgermaischterwahle z Bade-Wirttebärg iberregional bekannt woren isch as „Remstal-Rebell“. Dr Palmer isch scho ase Chind bi dr Wahlkämpf vu sym Vater derby gsii. Är isch e Großkusäng vum CDU-Bolitiker Christoph Palmer, wu friejer Landdagsabgordnete, Staatsminischter, Verdröute vum Minischterbresidänt Erwin Teufel un Kraisvorsitzer vu dr Stuegerter CDU gsii isch.

Noch em Abitur 1992 an dr Freie Waldorfschuele Engelberg^[1] het dr Palmer dr Wehrdienscht verwaigeret un sy Zivildienscht bim DRK absolviert. Derno het er vu 1993 bis 1999 Gschicht un Mathematik uf Lehramt an dr Universitet Dibenga un z Sydney studiert Noch em Studium het er as wisseschaftlige Mitarbaiter fir d Fraktion vu Bindnis 90/Di Griene im Bundesdag gschafft.

Dr Palmer isch mit dr griene Bundesdagsabgordnete un Europaabgordnete Franziska Brantner liiert gsii.^[2][3] Är het as ain vu dr erschte Oberburgermaischter z Dytschland no dr Geburt vu ihre gmainsame Dochter im Mai 2010 vu Ändi Augschte bis Aafangs Novämber 2010 fir zwee Monet Elteregäld in Aaspruch gnuu un het sy Amt in däre Zyt rueje loo.^[4] Im Oktober 2013 het dr Palmer bekannt gee, dass är un d Brantner si drännt hebe, des aber us em Bundesdagswahlkampf hän welle uusehalte.^[5]

Zäme mit syre Läbespartneri Magdalena Ruoffner het dr Palmer zwee Sihn, wu 2015 un 2020 uf d Wält chuu sin.^[6][7] Im Dezämber 2021 het s Baar ghyrote.^[8]

In syre Studiezyt isch dr Palmer as Studäntenverdrätter aktiv gsii. An dr Universitet isch er vu 1995 bis 2000 AStA-Referänt fir Umwält un Verchehr gsii. Um des Zyt het er e Konzäpt fir d Yyfierig vu Nachtbus im Ruum Dibenga entwicklet, wu ab April 1996 umgsetzt woren isch, un het an dr Yyfierig vum Semeschterticket mitgwirkt. Dr Palmer het si fir Studiegebihre im Noolauf uusgsproche.

Syter anne 1996 isch dr Palmer Mitglid bii Bindnis 90/Di Griene. Vu 1997 bis 2000 het er em Vorstand vum Dibenger Kraisverband vu syre Bartei aaghert. Im Novämber 2012 isch er bi dr Wahl zum Barteirot vu Bindenis 90/Di Griene uf dr letscht Blatz chuu un het em 16-chepfige Gremium syterhär nimi aaghert.^[9]

Dr Palmer isch anne 2001 zum erschte Mol in dr Landdag vu Bade-Wirttebärg gwehlt wore, wun er iber e Zwaitmandat dr Wahlkrais Dibenga verdrätte het. Är isch Mitglid im Uusschuss fir Umwält un Verchehr un umwält- un verchehrsbolitische Sprächer vu dr Fraktion Bindnis 90/Di Griene gsii. In däre Funktion het er zue dr profilierteschte Kritiker vum Verchehrs- un Stedteböuprojäkt Stuttgart 21 ghert.

Bi dr Landdagswahl 2006 isch dr Palmer wider zum Abgordnete gwehlt wore. In sym Wahlkrais isch er uf e Stimmenaadail vu 22,1 % chuu, dodermit sin di Griene do zum erschte Mol zwootsterkschti Bartei vor dr SPD wore. Dr Palmer isch zue aim vu drei stellverdrättende Fraktionsvorsitzer gwehlt wore, het die Funktion mit em Amtsaadritt zum Oberburgermaischter vu Dibenga aber wider abgee. Zum 25. Mai 2007 het er sy Landdagsmandat niderglait, wien er s vor dr Oberburgermaischterwahl aagchindet ghaa het.^[10]

Im Spotjohr 2004 het si dr Palmer as Kandidat vu dr Griene fir s Amt vum Oberburgermaischter vu Stuegert beworbe. Im erschte Wahlgang am 10. Oktober 2004 isch er uf e Stimmenaadail vu 21,5 % chuu un isch dodermit 2,8 Brozäntpink iber em Ergebnis vu dr Griene bi dr Gmaindsrotswahl vum 13. Juni 2004 gläge. Hinter em Amtsinhaber Wolfgang Schuster (CDU) un dr Ute Kumpf (SPD), wu baidi di erforderli absolut Stimmemeehait verfählt ghaa hän, isch dr Palmer uf Blatz drei gläge un het wäge em dytlige Ruckstand uf di zwootblatziert Ute Kumpf sy Kandidatur zruckzoge. Mit baide Konkurränt het er Gspräch gfiert iber megligi inhaltligi Zuegständnis. Doderby het dr Schuster im Unterschid zue dr Kumpf en Entgegechuu in sechs Pinkt signalisiert, was dr Palmer derno in ere effetlige Stellignahm darglait het.^[11] Dr Schuster het unter anderem erklert, dass e Burgerentschaid iber s umstritte Großprojäkt Stuttgart 21 bi erheblige Cheschtestaigerige fir d Stadt megli sei. Em Palmer syni Uussage fir dr zwoot Wahlgang am 24. Oktober sin as indiräkti Wahlempfählig fir dr Schuster interpretiert wore un hän heftigi un kontroversi Reaktione firigruefe.^[12] E Huffe Beobachter hän des as Reaktion aagsääne uf s Verhalte vu dr Stuegerter SPD bi dr Oberburgermaischterwahle z Stuegert anne 1996, wu dr im erschte Wahlgang drittblatziert SPD-Bewärber Rainer Brechtken nit berait gsii isch, sy Kandidatur zruckzzie un dodermit villicht e Wahlsiig vum Griene Rezzo Schlauch verhinderet het. Wu di Stuegerter Griene bi dr Gmaindrotswahl im Juni 2009 sterkschti Bartei wore sin, het dr Palmer zerscht Inträssi an ere nomolige Kandidatur bi dr Stuegarter Oberburgermaischterwahl anne 2012 ghaa,^[13][14] het aber im Merz 2010 verchindet, ass er vun ere sonige Kandidatur absiht.

Am 22. Oktober 2006 isch dr Palmer zum Oberburgermaischter vu Dibenga gwhelt woret. Al Rusforderer vu dr syt acht Johr amtierende Amtsinhaberin Brigitte Russ-Scherer (SPD) isch er scho im erschte Wahlgang mit eme Stimmenaadail vu 50,4 % uf di erforderli absolut Mehhait chuu. D Russ-Scherer het 30,2 % iberchuu, sunschtigi Kandidaten insgesamt 19,4 %. Di Wahlbedailigung isch bi 51,6 % gläge.^[15] Vierehalb Monet no sym Amtsaadritt het dr Palmer sy Landtagsmandat niderglait. Fir ihn isch d Ilka Neuenhaus in dr Landdag noogruckt.

Am 19. Oktober 2014 isch dr Palmer mit 61,7% vu dr Stimmen im erschte Wahlgang widergwehlt wore, sy Gegekandidati Beatrice Soltys isch uf 33,2% chuu.^[16]

Wäge verschidene umstrittene Uussage het sy Bartei ihn zue dr Oberburgermaischterwahl 2022 nimi ufgstellt, är isch derno as unabhängige Kandidat aadrätte. Bi dr Wahl am 23. Oktober 2022 isch er im erschte Wahlgang mit 52,4 % vu dr Stimme as Oberburgermaischter widergwehlt wore.^[17]

Noch eme Eklat um Uussage vum Plamer am Rand vun ere Kumferänz iber Migrationsbolitik z Frankfurt am 28. April 2023 isch dr Palmer am 1. Mai us dr Bartei Bindnis 90/Di Griene uusdrätte.^[18][19]

• Boris Palmer: Eine Stadt macht blau. Politik im Klimawandel - das Tübinger Modell. Kiepenheuer & Witsch, Köln 2009, ISBN 978-3-462-04113-2. 

 Commons: Boris Palmer – Sammlig vo Multimediadateie

• Offiziälli Websyte
• Websyte vum Dibenger Oberburgermaischter
• Diplomarbeit über em Palmer sy OB-Wahlkampf 2004
• Interview mit em Vater Helmut un em Suhn Boris Palmer
• Georg Löwisch: Das Rebellenkind. In: die tageszeitung. 17. Oktober 2006, abgruefen am 30. Juli 2010 (Porträt). 

1. ↑ Peter Unfried: Wo, wenn nicht in Tübingen? URL ungültig Tageszeitung, 15. Januar 2007, abgruefen am 9. März 2010. 
2. ↑ Archivierte Kopie. Archiviert vom Original am 3. Oktober 2018; abgruefen am 1. Dezember 2018. 
3. ↑ http://www.rnz.de//heidelberg/00_20130920060057_107131667_RNZ_Wahlforum_Alle_sassen_erstmals_an_einem_Ti.html#ad-image-0 Archivlink (Memento vom 12. Novämber 2013 im Internet Archive)
4. ↑ Letzter Arbeitstag des Tübinger OB vor der Elternzeit. In: Schwäbisches Tagblatt. 26. August 2010, archiviert vom Original am 3. Dezember 2010; abgruefen am 13. November 2010. 
5. ↑ Archivierte Kopie. Archiviert vom Original am 19. Februar 2014; abgruefen am 20. Oktober 2014. 
6. ↑ Gernot Stegert: OB Palmer wurde erneut Vater. In: Schwäbisches Tagblatt Tübingen. 23. August 2015, abgruefen am 18. Januar 2019. 
7. ↑ Boris Palmer nimmt Auszeit fürs Baby. Stuttgarter Zeitung, 8. Juni 2020, abgruefen am 17. August 2021. 
8. ↑ Boris Palmer hat geheiratet. Stuttgarter Zeitung, 22. Dezämber 2021.
9. ↑ http://www.spiegel.de/politik/deutschland/tuebingens-oberbuergermeister-palmer-fliegt-aus-dem-gruenen-parteirat-a-867872.html
10. ↑ Palmer gibt Landtagsmandat ab. (PDF; 47 kB) In: Pressemitteilung von Boris Palmer. Boris Palmer, 3. April 2007, archiviert vom Original am 28. September 2007; abgruefen am 10. März 2010. 
11. ↑ Stuttgarts Zukunft entscheiden die Bürgerinnen und Bürger, nicht Parteien. (PDF; 20 kB) Abgruefen am 10. März 2010. 
12. ↑ Forumsdebatte auf Palmers Webseite zur Stuttgarter OB-Wahl. Abgruefen am 10. März 2010. 
13. ↑ Thomas Borgmann: OB Schuster blickt ratlos in die Runde. Stuttgarter Zeitung, 9. Juni 2009.
14. ↑ Konstantin Schwarz: Palmer hält sich OB-Kandidatur 2012 offen. Stuttgarter Nachrichten, 9. Juni 2009.
15. ↑ Oberbürgermeisterwahl am 22. Oktober 2006. Stadt Tübingen, abgruefen am 5. Mai 2023. 
16. ↑ Oberbürgermeisterwahl am 19. Oktober 2014 uf tuebingen.de, abgruefen am 5. Mai 2023
17. ↑ Boris Palmer bleibt Oberbürgermeister von Tübingen. In: Der Spiegel. 23. Oktober 2022, ISSN 2195-1349 (spiegel.de [abgerufen am 23. Oktober 2022]). 
18. ↑ Christine Keck: Grünenpolitiker Boris Palmer tritt aus der Partei aus. In: Der Spiegel. 1. Mai 2023, ISSN 2195-1349 (spiegel.de [abgerufen am 1. Mai 2023]). 
19. ↑ Tübingens OB Palmer nimmt Auszeit und tritt bei Grünen aus. In: tagesschau.de. 1. Mai 2023, abgruefen am 1. Mai 2023. 

Dä Artikel basiert uff ere fräie Übersetzig vu dere Version vum Artikel „Boris_Palmer“ vu de dütsche Wikipedia. E Liste vu de Autore un Versione isch do z finde.