Indonésia

Kiblik Indonésia Republik Indonesia (Indonésia)
Ibu negeri	Jakarta
Nama pengendek	Indonésia

Indonésia atawa Indunisia (hurup Arab Gundul: اندونيسيا) atawa nama resminya Kiblik Indonésia (hurup Arab Gundul: کبليک اندونيسيا; Indonésia: Republik Indonesia) nya'entu atu negara nyang pernahnya di Asia Kidul-wètan. Ni negara diliwatin garis katulistiwa èn juga' lempengannya ada di antara benua Asia èn benua Ostrali, sama antara Laotan Anteng èn juga' Laotan Hindi. Dengen 17.504 pulo nyang ngejeprah dari Sabang sampé Merauké, Indonésia jadi negara kepuloan paling gedé ke-6 di dunia.^[1] Ni negara watesan darat ama Malésia, Papua Nugini, èn Timor Wètan. Adapun negara tetangganya antara laèn Singapur, Bruné, Palo, Ostrali, ama Kepuloan Andaman èn Nikobar di Negeri Hindi.

Ni negara punya jumblah penjogrog cupleknya – 275.344.166 mengrikut Sensus Penduduk tahon 2022;^[2] èn kerangsekannya – 146 orang/km². Bahnanya, ni negara punya penjogrog paling banyak ke-4 seantéro dunia. Baè' ibu negeri ama kota paling gedénya entu Jakarta. Sekarang, Indonésia dibelèk-belèk jadi 37 propinsi. Basa persatuan èn pemerèntahannya – basa Indonésia. Adapun suku nyang paling ngebadeg ada di mari ya'entu orang Jawa.

Indonésia entu atu negara penjegreg ASEAN èn juga' anggota di macem-macem paguyuban antérobangsaan, misalnya: G-20, PBB, OKI, ènsb. Bagèn kata penjogrognya paling ngebadeg agamanya Selam, resminya, ni negara bukan negara Selam. Sekarang, persidènnya – Joko Widodo ama dia punya wakil – Ma'ruf Amin. Ni negara punya semboyan – Bhinneka Tunggal Ika "béda-béda tapi atu juga'". Nah kalo dia punya dasar negara – Pancasila.

1. ↑ "Which Countries Have The Most Islands?". World Atlas (dalem basa American English). 5 Oktober 2020. Diarsipin deri nyang asli tanggal 2022-01-24. Dipungut 23 April 2022.
2. ↑ "Data Kependudukan" (dalem basa Indonésia). Kementerian Dalam Negeri Republik Indonesia. Dipungut 2024-09-15.