Kultaa ^[1]e la dɔɔ ne pɔge naŋ laŋ noɔre yeni ne nɔmmo a na laŋ zeŋ, ka ba yideme meŋ sage tu a kultaa yeltuuri zaa ka a ta nɛnɛ ka ba na laŋkpeɛrɛ a dɔgerɔ biiri. Kultaa maŋ kyaare la yie ayi naŋ sage ka ba kɔɔle lantaa e bon-yoni, o ba maŋ e dɔɔ ne pɔge yoŋ yɛlɛ ba yideme meŋ maŋ poɔ la. ^[2]Dɔɔ la maŋ de pɔge, pɔge ba derɛ dɔɔ a dagaweɛŋ. A yeluŋ ŋa wuluu la ka a pɔge la maŋ bare o saayiri kyɛ gaa a dɔɔ zie. A dɔɔ la maŋ te tu a pɔge yele. Dagaweɛŋ, dɔɔ ba derɛ o tɔ dɔɔ, pɔge meŋ ba kulo o tɔ pɔge. A lɛ waa la kyiiruŋ kpoŋ ane yelbalɔre.^[3][4]

1. Pɔge-bɔ-deraa: Ona la a pɔge naŋ zeŋ o saayiriŋ bee a be zie kaŋa ka dɔɔ nyɛ o, ka o ne o yɛlɛ kpɛ ka ba kuli kultaa.
2. Dendegi pɔge (dendeu): Pɔgelee pɔge naŋ maŋ deɛ o saayiriŋ a guoli de ko o serɛ bee sereba la dendegi pɔge.
3. Pɔge piiraa: O waa la pɔge fo naŋ gɛrɛ yiri ka ba dɔgɛɛ, ka fo piili tuuro o yele ka o wa e kpoŋ ka fo de.
4. Teeŋ pɔge: Ona la pɔge teeŋ-erɛ naŋ saŋ o baaloŋ ka a pɔge saamine leɛ de o ko tee-erɛ.
5. Kopɔge/pɔgekoɔre: Pɔge serɛ naŋ kpi kyɛ kyɛre o ka a yiri neɛkaŋa leɛ de a kopɔge.
6. Pɔge nyɔgraa: o waa la pɔge ba naŋ ŋmaa nyɔge ka a ba e awa o ne a noba yelbaŋ la.
7. Toma pɔge: ona la pɔge ba naŋ de ko dɔɔ, a dɔɔ toma zuiŋ.
8. Are-pɔge: ona la neɛ naŋ gaa o areyiri te de bee o aremine naŋ ko o.
9. Zɔmen-pɔge: pɔge ne zɔmeŋa naŋ de ko o ba zɔmennoŋ na zuiŋ.

Kultaa yeltuuri waa la ata. Ana la; puoruu, kyegri ane saandaanzɔ^[5]

puoruu la dɛndɛŋ gaabo na a dɔɔ yideme naŋ maŋ gaa a pɔge yideme zie ne bontaarre mine ka ka ba tepeɛre a pɔge saamine nyɛ ka ba de la a pɔge ko dɔɔ bee ka o waa la bisoli. Gbɛɛ yaga, boma ba naŋ maŋ gaa ne la guori ne libiri fee. Ka ba de a bie ko dɔɔ kyɛ ka ba gaa bee ka ba ba ko o dɔɔ, kyɛ ba ba leɛrɛ a puoruu boma terɛ.

Kultaa Wɛltaa la dɔɔ ne o pɔge naŋ laŋ noɔre yeni ne nɔmmo a kpeɛrɛ tasoga ka yelkaŋa kpɛ ba sogaŋ bee kpakyaga ka a pɔge yi gaa o saayiri bee zie kaŋa te kpeɛrɛ bee a te kuli Serɛ kyɛ bare a dɔɔ.

• Kūū maŋ vɛŋe la ka dɔɔ ane pɔge wɛltaa.
• Ka a pɔge bee dɔɔŋ wa e soɔba na baŋ vɛŋ la ka ba wɛltaa
• Sɛnsɛŋ te gaale maŋ vɛŋ la ka dɔɔ ane pɔge wɛltaa.
• Sɛngaŋ yɛlɛ te gaale maŋ wane la kultaa wɛltaa.
• Nannyigiroŋ, zɔɔre, entuo, ba dɔgebo ane dãã nyu tegaale maŋ wane la kultaa wɛltaa.

1. Kultaa wɛltaa saana la noba zuri
2. Kultaa wɛltaa ŋmaara la doŋ ennɛ a pɔge ne a dɔɔ yideme
3. Ka a pɔgeŋ wa zagere serɛ kulbu, a serɛ libie maŋ tuuli la kõɔ gaa.
4. Ka banaŋ wa taa biiri, a biiri maŋ leɛ la dɔgɛɛ noba
5. Ka banaŋ bare taa, a dɔɔ bee a pɔge yoŋ la maŋ dire dɔgɛɛ kaara biiri
6. Wagere kaŋa, a biiri ba maŋ nyɛ guolbu fẽẽ zaa