Albania
.svg)
Albania[12] (n'albanés Shqipëri, país del aigla) ye una república del oeste de la península de los Balcanes, abierta al Mar Adriáticu y al Mar Xónicu.
Albania llenda al norte con Montenegru, al noreste con Serbia, al este cola República de Macedonia y al sur con Grecia.
Nun territoriu de 28.747 km², compuestu mayormente de montes y viesques, viven alredor de 3,5 millones d'habitantes. Les principales ciudaes son la capital, Tirana con 300.000 habitantes, Durrës, Elbasan y Shkodër, con 100.000 habitantes caúna, Vlorë (90.000 hab.) y Korçë (80.000 hab.).
Xeografía
[editar | editar la fonte]
Albania ye un país enforma montesu (70 % del territoriu). El picu cimeru, el monte Korab, tien un altor de 2.753 m penriba'l nivel de la mar.
El restu de la superficie ta compuestu por valles estrenchos y llanures aluviales, escasamente aprovechables pa l'agricultura al alternar les inundaciones coles époques de seca. Les tierres más fértiles son les de la vera de los llagos (Ohrid, Prespa Mayor y Prespa Menor) y les de delles mesetes intermediaries ente'l llanu y el monte.
El ríu mas importante ye'l Drini. Con un llargor de 282 km, ye ún de los pocos con un caudal estable tol añu. Los otros ríos, hasta dalgunos como'l Semani o'l Vjosa de más de 160 km, tán cásique secos dafechu pel branu.
Albania dispón de 450 km de costa ente'l mar Xónicu y el mar Adriáticu.
Na marina, el clima ye mediterraneu, con una temperatura media añal de 16° (7° pel iviernu). D'otra banda, nel interior domina un clima continental, con una media de 10° y contrastes bruscos de temperatura a lo llargo l'añu.
Los principales recursos naturales son el petroleu, el gas natural, el carbón, el cromo, el cobre, la madera, el níquel y la fuercia hidroeléctrica.
Historia
[editar | editar la fonte]Los albaneses son descendientes de los ilirios, pueblu de fala indoeuropea que vivía na Europa central y emigró al sur alredor del añu 1000 e.C.. Ún d'esos grupos d'ilirios, los ghegs, asentáronse nel norte de l'actual Albania; otru, los tosks, asentáronse nel sur, aú vivieron amestaos con colonizadores griegos. Más llueu, dende'l sieglu I, el territoriu formó la provincia romana d'Iliria, que pasó a depender alministrativa del Imperiu Romanu d'Oriente dempués de 395.
Les invasiones turques entamaron nel sieglu XIV y siguieron nel siguiente. Magar que les milicies dirixíes pol héroe nacional Gjergj Kastrioti Skenderbeg consiguió resistise a l'anexión al Imperiu otomanu, esta fízose efectiva cuando elli morrió, en 1468.
En 1912 el país algamó la so independencia, y entró na Sociedá de Naciones en 1920. Ente 1925-28 tuvo un sistema de gobiernu republicanu, pero dempués convirtióse nuna monarquía. Ente 1928 y 1948 Albania foi una monarquía, na que reinaron Zog I d'Albania (1928-1939) y, demientres la ocupación italiana na Segunda Guerra Mundial, Vitor Manuel III de Saboya (1939-1943). Tres la Segunda Guerra Mundial, los comunistes, dirixíos por Enver Hoxha tomaron el poder. Ente 1944 y 1990, cinco años dempués de que morriera Hoxha, Albania conoció una dictadura d'inspiración estalinista. Les sucesives rotures del réxime cola Yugoslavia de Tito (1948), la XRSS (1961) y China (1978) llevaron al país a una política d'aislamientu total y d'autarquía. Les consecuencies d'esta política fueron el retrasu teunolóxicu y económicu, amás d'una terrible represión.
Dende 1990 los problemes económicos provocaron disturbios y manifestaciones, que ficieron cayer al gobiernu. En 1992 elixióse un gobiernu non comunista, y el país salió del so aisllamientu. De magar Albania conoz una evolución hacia la democracia, pero ha de facer frente a problemes económicos, al crime organizáu y a la llegada masiva de refuxaos de Kosovu (Serbia). En 2009 convirtióse en miembru de la OTAN, y lleva yá dellos años tentando por convertise nun miembru de la Xunión Europea.
Política
[editar | editar la fonte]Dende 1990, Albania ye una democracia parllamentaria.
El xefe d'estáu ye'l Presidente de la República, elixíu por 5 años per aciu de sufraxu indireutu pola Kuvendi (Xunta). El Presidente de la república noma al Primer Ministru y al gobiernu (17 ministros y 9 secretarios d'Estáu) y somételos a l'aprobación de la Kuvendi.
La Kuvendi e Shqipërisë (Xunta d'Albania), conocida na dómina comunista como Kuvendi Popullor (Xunta del pueblu) ye un parllamentu monocameral, con competencies en materia de política interior, esterior y pa modificar la constitución.
La mayoría de la Kuvendi renuévase cada cuatro años y compónse de 100 diputaos elixíos por mayoría absoluta, a los que s'amiesten otros 40 escoyíos proporcionalmente polos partíos.
Los principales partíos políticos albaneses son:
- Partíu Socialista d'Albania (Partia Socialiste e Shqipërisë, PSSH), fundáu en 1991 y miembru de la Internacional Socialista. Dirixíu pol actual primer ministru Fatos Nano, gobierna'l país dende 1997. Nes eleiciones de 2001, recibió'l 41,5% de los votos (52,8% en 1997) y cuenta con 73 diputaos na Kuvendi.
- Partíu Democráticu d'Albania (Partia Demokratike e Shqipërisë, PDSH), de tipu conservador. Ye'l principal partíu de la oposición dende 1997. En 2001, col 36,8% de los votos algamó 46 diputaos (35 en 1997)
- Partíu Democráticu (Partia Demokrate): 5,1% de los votos y 6 diputaos.
- Partíu Social-demócrata (Partia Social-Demokrate, PSD): aliáu al PSSH de Fatos Nano. En 2001 obtuvo'l 3,6% de los votos y 4 diputaos.
Xeografía d'Albania
[editar | editar la fonte]Organización alministrativa
[editar | editar la fonte]Albania ta dividida en condaos en base a la constitución de 1998.[13][14] Los 12 condaos sustituyeron a los antiguos distritos. Los condaos tan dixebraos en 61 conceyos.[15]
| Escudu | Condáu | Conceyos | Superficie (km²) | Situación | Población (2016)[16] |
|---|---|---|---|---|---|
 |
Berat | Berat, Kuçovë, Poliçan, Skrapar, Ura Vajgurore | 1,798 |  |
139,815 |
 |
Dibër | Bulqizë, Dibër, Klos, Mat | 2,586 |  |
134,153 |
 |
Durrës | Durrës, Krujë, Shijak | 766 |  |
278,775 |
 |
Elbasan | Belsh, Cërrik, Elbasan, Gramsh, Librazhd, Peqin, Prrenjas | 3,199 |  |
298,913 |
 |
Fier | Divjakë, Fier, Lushnjë, Mallakastër, Patos, Roskovec | 1,890 |  |
312,448 |
 |
Gjirokastër | Dropull, Gjirokastër, Këlcyrë, Libohovë, Memaliaj, Përmet, Tepelenë | 2,884 |  |
70,331 |
 |
Korçë | Devoll, Kolonjë, Korçë, Maliq, Pogradec, Pustec | 3,711 |  |
221,706 |
 |
Kukës | Has, Kukës, Tropojë | 2,374 |  |
84,035 |
 |
Lezhë | Kurbin, Lezhë, Mirditë | 1,620 |  |
135,613 |
 |
Shkodër | Fushë-Arrëz, Malësi e Madhe, Pukë, Shkodër, Vau i Dejës | 3,562 |  |
215,483 |
 |
Tirana | Kamëz, Kavajë, Rrogozhinë, Tirana, Vorë | 1,652 |  |
811,649 |
 |
Vlorë | Delvinë, Finiq, Himarë, Konispol, Sarandë, Selenicë, Vlorë | 2,706 |  |
183,105 |
Economía
[editar | editar la fonte]Según los datos oficiales, engañosos nun país con un gran porcentaxe d'economía sumida, el PIB del país ye (2007) de de 10.456 millones de dólar d'Estaos Xuníos|dólares, con una renta per cápita de 3.290 dólares. El 22,8% del PIB correspuénde-y al sector primariu, el 21,5% al secundariu y el 55,7% al terciariu. La población económicamente activa (2006) yera'l 34,6%, concretamente 1.084.000 persones, y la tasa oficial de paru yera del 13,8%.
El presupuestu estatal ta enforma desequilibráu, una y bones la economía sumida fai que los ingresos por impuestos nun seyan a equilibrar un presupuestu que tien cuasi un 80% de gastu corriente. El serviciu de la deuda esterna, que yera de 1.588 millones de dólares en 2006, consumía'l 12,2% del presupuestu del país.
El sector primariu ocupa al 58% de la población. Ente los cultivos del país destaquen, pola so importancia económica, l'alfalfa pa cebera del ganáu (2.962.000 tonelaes en 2006), el maíz (245.400 t) y el trigu (230.900 t). No que cinca a la ganadería, l'añu citáu había rexistraes nel país 1.830.000 oveyes, 940.000 cabra|cabres y 634.000 reses.
El país tien d'importar tamién parte de les fontes d'enerxía. Ye autosuficiente en gas natural, pero tien d'importar petroleu y lletricidá, que representen el 16,7% de les importaciones del país. La so balanza comercial ye perdeficitaria: importa maquinaria, alimentos, materiales de construcción, testiles... Les sos esportaciones nun tán mui diversificaes, una y bones el 48,4% de les mismes correspuenden a productos testiles y zapatos. Los principales socios comerciales del país son: Italia, del que vienen el 27,1% de les importaciones y al que van el 68,1% de les esportaciones; y Grecia, llugar d'orixe del 14,6% de les importaciones albaneses y destinu del 8,3% de les esportaciones.
Demografía
[editar | editar la fonte]Albania tenía, en 2008, una población de 3.194.000 habitantes; un 49,82% d'ellos yeren varones y un 50,18% femes. Tocántenes a la distribución por edá, en 2005 había un 26,9% de neños (menores de 15 años) y otru 25,3% de persones ente 15 y 29 años. La tasa de nacimientos por 1.000 habitantes (2007) yera de 10,7, y la de muertes del 4,8. La media de fíos por muyer n'edá de criar yera, en 2006, de 2,03. La esperanza de vida, nesi mesmu añu, yera de 74,8 años pa los homes y de 80,3 pa les muyeres.
No que cinca a la composición étnica del país, nel añu 2000 el 91,7% de la población yera albanesa, con un 2,3% de griegos, un 1,8% d'aromunes, un 1,8% de xitanos y un 2,4% de población d'otres etnies.
La relixón mayoritaria ye la musulmana. Un 68% de los albaneses sonlo (51% sunníes y 17% bektashis), y hai un 22% de cristianos ortodoxos y un 10% de católicos.
El 44,5% de la población (2004) vivía nun entornu urbanu. Les mayores ciudaes del país (2001) son les que vienen darréu:
- Tirana: 343.078 habitantes
- Durrës: 99.546 habitantes
- Elbasan: 87.797 habitantes
- Shkodër: 82.455 habitantes
- Vlorë: 77.691 habitantes
Bibliografía
[editar | editar la fonte]Referencies
[editar | editar la fonte]- ↑ URL de la referencia: https://www.oic-oci.org/states/?lan=en. Data de consulta: 29 ochobre 2022.
- ↑ URL de la referencia: https://www.interpol.int/Member-countries/World. Editorial: Interpol. Data de consulta: 7 avientu 2017.
- ↑ URL de la referencia: https://www.opcw.org/about-opcw/member-states/. Editorial: Organización pa la Prohibición d'Armes Químiques. Data de consulta: 7 avientu 2017.
- ↑ URL de la referencia: http://www.unesco.org/eri/cp/ListeMS_Indicators.asp.
- ↑ URL de la referencia: http://www.upu.int/en/the-upu/member-countries.html. Data de consulta: 4 mayu 2019.
- ↑ URL de la referencia: https://www.itu.int/online/mm/scripts/gensel8. Data de consulta: 4 mayu 2019.
- ↑ URL de la referencia: https://public.wmo.int/en/members/albania. Data de consulta: 26 mayu 2020.
- ↑ URL de la referencia: https://www.who.int/choice/demography/by_country/en/. Data de consulta: 21 xunetu 2020.
- ↑ URL de la referencia: https://www.wcoomd.org/-/media/wco/public/global/pdf/about-us/wco-members/list-of-members-with-membership-date.pdf. Data de consulta: 16 marzu 2024. Páxina: 4. Supports qualifier: data de principiu.
- ↑ Aplícase a esta parte: masculín singular.
- ↑ Aplícase a esta parte: femenín singular.
- ↑ (2010) Cartafueyos Normativos. Nomes de los países del mundu y de les sos capitales y xentilicios. Uviéu: Academia de la Llingua Asturiana. ISBN 978-84-8168-500-8.
- ↑ «1998 CONSTITUTION OF THE REPUBLIC OF ALBANIA» (english).
- ↑ «A Brief History of the Administrative-territorial Organization in Albania» (english).
- ↑ «A Brief History of the Administrative-territorial Organization in Albania» (english).
- ↑ «Popullsia e Shqipërisë» (albanian) (19 February 2016). Archiváu dende l'orixinal, el 2016-04-12.
Enllaces esternos
[editar | editar la fonte]
Wikimedia Commons acueye conteníu multimedia sobre Albania.- Sitiu oficial del Presidente de la República (n'inglés)
- Sitiu oficial del Gobiernu albanés (n'inglés)
| Estaos | Albania · Alemaña · Andorra · Austria · Bielorrusia · Bélxica · Bosnia y Herzegovina · Bulgaria · Chequia · Croacia · Dinamarca · Eslovaquia · Eslovenia · España · Estonia · Finlandia · Francia · Grecia · Hungría · Irlanda · Islandia · Italia · Letonia · Liechtenstein · Lituania · Luxemburgu · Macedonia del Norte · Malta · Moldavia · Mónacu · Montenegru · Noruega · Países Baxos · Polonia · Portugal · Reinu Xuníu · Rumanía · Rusia · San Marín · Serbia · Suecia · Suiza · Turquía · Ucraína · Vaticanu · Xeorxa · Xipre |  |
|---|---|---|
| Dependencies | ||
| Rexón autónoma | ||
| Países con status discutíu | ||
| Organización pa la Cooperación Islámica | ||
|---|---|---|
| Afganistán | Albania | Arabia Saudita | Arxelia | Azerbaixán | Baḥréin | Bangladex | Benín | Brunéi | Burkina Fasu | Camerún | Chad | Comores | Costa de Marfil | El Líbanu | Emiratos Árabes Xuníos | Exiptu | Gabón | Gambia | Guinea | Guinea-Bisáu | Guyana | Indonesia | Irán | Iraq | Kazakstán | Kirguistán | Kuwait | Libia | Malasia | Maldives | Malí | Marruecos | Mauritania | Mozambique | Níxer | Nixeria | Omán | Paquistán | Palestina | Qatar | Senegal | Sierra Lleona | Siria | Somalia | Sudán | Surinam | Taxiquistán | Togu | Tunicia | Turkmenistán | Turquía | Uganda | Uzbequistán | Xibuti | Xordania | Yeme
Países observadores: Bosnia y Herzegovina | República Centroafricana | Rusia | Tailandia | República Turca de Xipre del Norte | ||
| Control d'autoridaes |
|
|---|
