Kunst

Dat Woort "Kunst" kummt von "könen oder künnen" un betekent allns, wat de Minsch mit utermaten Könen tostannbringt. Dat kann sik um Dichtung, Musik, Danz, Theater, Bildhaueree oder ok um Architektuur hanneln. Enen egentlichen Sinn un Sweck hett de Kunst nich. Se will blots wat darstellen, wiesen oder utseggen un darmit de Tolüsterers oder Tokiekers to'n Nadenken anrögen.

Versteiht sik vun sülvst, dat för jede künstlerische Utsaag en groot Maat an Könen nödig is. Of sik dat um dat Singen vun en Leed, um dat Malen vun en Bild oder dat Tosamenfögen vun Wöör to en Gedicht hannelt, dat is eendoont, överall is ene praktische Lehr, veel Verstand un Kreativität nödig. Fröher gungen de jungen Künstler bi enen Meister in de Lehr un keken sik de Kunstgrepen af. Hüüt besöökt se ene Kunstakademie oder ene Hoochschool un studeert all dat, wat neven dat Handwarkliche noch an Theorie nödig is. Darto höört t.B. Stilkunde un Kunstgeschichte. Wat man aver nich studeern kann, dat is de Kreativität, de Utsagekraft, den Drang wat mittodelen un Achtergrünnen klaartomaken. Bi enen groden Künstler kummt dat mehr vun binnen herut un is darum faken dat, wat de echte Kunst utmaakt.