Mig-21

Lo Mig-21 (« икоян и Гуревич МиГ-21 » en rus) es un avion de caça supersonic desvolopat per l'Union Sovietica dins lo corrent de la fin deis annadas 1950. Aperaquí 11 000 exemplars foguèron produchs de 1959 e 1985 e largament adoptat dins lo blòt sovietic ò dins lei país dau Tèrç Mond en causa de sei performàncias e de son còst feble. Ansin, en 2012, 793 unitats èran encara en servici dins lo mond.

A conegut un nombre important de combats, especialament dins lo corrent de la Guèrra de Vietnam, la Guèrra dei Sièis Jorns, la Guèrra de Kippur, de la Tresena Guèrra Indopaquistanesa e de la Guèrra Iran-Iraq. Coma es un avion sensa ajuda electronica au pilotatge, sei performàncias varian considerablament en foncion de l'entraïnament dau pilòta e de seis opausants. Ansin, leis aparelhs vietnamians e arabis capitèron d'infligir de pèrdas a seis adversaris estatsunidencs ò israelians mai subiguèron generalament de pèrdas pus importantas^[1]. Dins aquò, au mens 13 pilòtas vietnamians e 3 sirians obtenguèron l'estatut d'as dau combat aerian (5 victòrias ò mai) pendent aquelei guèrras. En 1971, lei Mig 21 indians dominèron lei F-104 Starfighter paquistanés^[2]. Pasmens, au començament deis annadas 1980, leis engatjaments dei Mig 21 sirians còntra d'avions israelians pus modèrnes (F-15 e F-16) s'acabèron per de desfachas claras mostrant lei limits de l'aparelh còntra la generacion novèla d'aeronaus de combat^[1]. Enfin, entre 1980 e 1988, lei Mig 21 iraquians obtenguèron un resultat equilibrat còntra lei F-14 e lei F-4 iranians^[3][4].