Faa-Samoa

“E tele vaega e fia ave iai la’u faamuamua mo le manuia o lo’u itumalo”

September 6, 2023

1281

E tele vaega e fia ave iai le faamuamua mo le manuia lautele o lo’u itumalo, pe afai e manuia mai le taumafaiga i le faigapalota.”

O le saunoaga lea a le afioga ia Leausa Dr Take Naseri, lea o loo tauvaina le nofoa mo Vaa-o-Fonoti i le palota laititi o lo’o ua faatulagaina nei mo le Aso 13 ma le Aso 15 o Setema 2023.

Saunoa Leausa, “O vaega e fia ave iai le faamuamua pe afai e manuia mai i le faigapalota, e aofia ai le siitia o le tulaga o aoaoga ma le soifua maloloina lautele o tagata, ae maise o avanoa tutusa mo tagata uma o le itumalo”.

Check these out at SOS Call 📞 +685.21623

O le a ave foi se faamuamua a Leausa i le atiinaeina o tomai ma agavaa mo tupulaga talavou, e le gata i tomai faaleaoaoga, ae faapea foi taaloga, faatufugaga ma aganuu.

O le sini autu o le faamoemoe, ina ia mautu le tamaoaiga o aiga taitasi, ma alualu i luma le atiinaeina o aiga.

O le isi itu sa ta’ua e le sa avea ma Ofisa Sili o le Soifua Maloloina, o le nofo malamalama lea o le mamalu o le atunuu, ma sauniuni mo suiga o le tau. O lea e faamuamua ai i le sui tauva, le faalelei o atiinae tetele e pei o auala ma taligalu.

O le tofa ia Leausa, o le tiakono a le ekalesia EFKS i Masina, Fagaloa. O se tama fanau a le itumalo, sa faafailele mai lava i le olaga faaleaoaoga i totonu o le nuu.

Sa aoga le afioga ia Leausa i le Kolisi o Samoa, ma agai atu ai e faaauau i le aoga faafomai i Fiti, ma le Iunivesite i Papua Niu Kini. Sa aoaoina foi Leausa i le Iunivesete o Kuiniselani, ma Iunivesita i Amerika.

E silia atu ma le 30 tausaga o tautua i le falemai i Motootua, ma oo atu ai lava i le Ofisa Sili poo le Director General of Health e pei ona tulai mai ai i taimi o faafitauli faasoifua maloloina na feagai ma Samoa. Sa tautua foi o ia i le falemai tele i Waikato, Niu Sila, faapea foi le falemai io Fagaalu Amerika Samoa.

E ono ni suafa matai sa faapale ai o ia i aiga ma afioaga e aofia ai le suafa Leausa mai Masina, Fagaloa. O le suafa Tupa’i mai Lufilufi, Samau mai Fagalii, Fonoiava i Falevao, Toleafoa i Matanofo, Falelatai, ma le Mua’autau mai Nu’uli Amerika Samoa.

O le tofa ia Leausa, sa soifua mai nai ona matua, le afioga i le alii fomai ia Leausa Naioti Samau Dr Kitiona Naseri ua maliu, ma lona tina le afioga ia Fualefau Lepouli Soonalote Naseri o loo soifua pea.