Hendrik-Jan Boshoff
| Ds. Hendrik-Jan Boshoff | |
| |
Ds. Hendrik-Jan Boshoff
| |
| Naam | Hendrik Jan Boshoff |
|---|---|
| Geboorte | 12 Desember 1922 |
| Sterfte | 2 Mei 1990 (op 67) Onbekend |
| Kerkverband | Gereformeerd |
| Gemeente(s) | Piet Retief 1949–1950 Philipstown 1950–1952 Petrusburg 1952–1955 Bergsig 1955–1967 Sendeling Laeveld-kombinasie 1967–1975 Theunissen/Brandfort 1975–1985 |
| Jare aktief | 1949–1985 |
| Kweekskool | Potchefstroom |
Ds. Hendrik-Jan Boshoff (Onbekend, 12 Desember 1922 – Pretoria, Suid-Afrika, 2 Mei 1990) was tussen 1949 en 1985 predikant in vier kombinasies of gemeentes van die Gereformeerde Kerk en in een sendingwerkkring.
Ds. Boshoff is in 1949 deur die nasionale sinode geëksamineer en beroepbaar gestel. Nog in daardie jaar is hy bevestig in sy eerste gemeente, Piet Retief, maar reeds in die volgende jaar het hy ’n beroep aanvaar na Philipstown. Twee jaar later vertrek hy na Petrusburg in die Oranje-Vrystaat en bly daar tot 1955, toe hy die beroep aanneem na Bergsig in Pretoria, waar hy die eerste leraar was. Dié keer bly hy 12 jaar, want in 1967 aanvaar hy ’n beroep as sendeling van die Laeveld-kombinasie. Sy laaste werkking was die kombinasie Theunissen/Brandfort, van 1975 tot hy sy emeritaat 10 jaar later in 1985 aanvaar het. Hierna het hy en sy vrou, Baba, hulle op Heidelberg, Tvl., gaan vestig, maar hy is net ’n kort aftrede van nagenoeg vyf jaar gegun.
Hy en sy vrou, Baba (wat op 8 September 2018 oorlede is) was op verskeie terreine aktief. Sy vrou, wat ’n doktorsgraad in opvoedkunde gehad het, het weer begin skoolhou. Ds. Boshoff het nog dikwels die Woord in ander gemeentes gaan bedien. In 1989 het hulle na Pretoria verhuis. Sy laaste Woordbediening was in gemeente Wonderboom-Suid. Ná die aanddiens het hy vir sy vrou gesê hy voel moeg. Nadat hulle tuis gekom het, het hy ’n ernstige beroerteaanval gehad. Hy is in die hospitaal opgeneem en is die Woensdag oorlede.
Waardering
[wysig | wysig bron]Ds. Louis Buys het in ds. Boshoff se lewensberig in die GKSA se Almanak van 1991 geskryf hy het hom as ’n ernstige en toegewyde mens leer ken en as ’n goeie vriend. "Hy het sy roeping, reeds as student, met alle erns bejeën, en saam met Baba, sy eggenote, het hulle vrugbare diens gelewer in die verskillende gemeentes waar hulle opgetree het. Hy was ’n harde werker, en kon hom so met oorgawe toelê op die dinge wat vir hom eerste moes kom."
Bronne
[wysig | wysig bron]- (af) Buys, ds. Louis in De Bruyn, F.P.R et al. 1990. Die almanak van die Gereformeerde Kerke in Suid-Afrika vir die jaar 1991. Potchefstroom: Administratiewe Buro.
- (af) Harris, C.T., Noëth, J.G., Sarkady, N.G., Schutte, F.M. en Van Tonder, J.M. 2010. Van seringboom tot kerkgebou: die argitektoniese erfenis van die Gereformeerde Kerke. Potchefstroom: Administratiewe Buro.