Jacques Villeneuve
| Jacques Villeneuve | |
|---|---|
 Jacques Villeneuve in 2010
| |
| Geboortedatum | 9 April 1971 |
| Geboorteplek | Saint-Jean-sur-Richelieu, Quebec, Kanada |
| Volle naam | Jacques Joseph Charles Villeneuve |
| Nasionaliteit |  Kanadees
|
| Aktiewe jare | 1996–2006 |
| Ou span(ne) | Williams, BAR, Renault, Sauber, BMW Sauber |
| Inskrywings | 165 (163 weggespring) |
| Kampioenskappe | 1 (1997) |
| Oorwinnings | 11 |
| Podiums | 23 |
| Loopbaanpunte | 235 |
| Voorste wegspronge | 13 |
| Vinnigste rondtes | 9 |
| Eerste F1-wedren | 1996 Australiese Grand Prix |
| Eerste wen | 1996 Europese Grand Prix |
| Laaste wen | 1997 Luxemburgse Grand Prix |
| Laaste inskrywing | 2006 Duitse Grand Prix |
Jacques Joseph Charles Villeneuve (* 9 April 1971, Saint-Jean-sur-Richelieu, Quebec, Kanada) is 'n afgetrede Kanadese motorrenjaer, wat in 1997 wêreldkampioen in Formule Een geword het. Jacques is die seun van Gilles Villeneuve, 'n renjaer wat in 1982 tydens kwalifisering op die Zolder-renbaan in België verongeluk het.
Loopbaan
[wysig | wysig bron]
Villeneuve het in Monaco groot geword, waar hy onder mentorskap van Craig Pollock vordering getoon het in verskeie Formule 3-kampioenskappe. In 1994 skuif hy oor na die IndyCar-klas.
Ná hy in 1995 as kampioen in die IndyCar-reeks gekroon is, teken Villeneuve 'n kontrak vir 1996 met die Formule 1-span van Williams. In sy eerste ren beklee hy reeds die voorste wegspringplek, maar weens 'n tegniese probleem eindig Villeneuve toe tweede. In sy vierde ren behaal hy sy eerste Grand Prix-oorwinning. Hy moes ongelukkig die wêreldtitel aan Damon Hill afstaan, en Villeneuve eindig dié seisoen tweede met elf keer op die podium en 'n totaal van 78 punte. In 1997 wen Villeneuve die wêreldkampioenskap op die Jerez-renbaan, ná 'n omstrede botsing met Michael Schumacher.
In 1998 is daar 'n nuwe enjinleweransier vir Frank Williams se span. Uiteindelik blyk dit dat die Mecachrome-enjin nie kragtig genoeg is nie. Dit word 'n teleurstellende jaar vir Villeneuve sonder 'n Grand Prix-oorwinning. Na dié seisoen teken Villeneuve by die nuwe span van British American Racing. Villeneuve kon daar ook maar min regkry en in 2003 maak die span bekend dat hulle hom nie meer in 2004 sal benodig nie.
Villeneuve maak 'n terugkeer deur aan die einde van 2004 drie renne vir Renault te jaag. Teen die einde van 2004 teken hy 'n kontrak van twee jaar met Sauber, vir 2005 en 2006.
In 2005 eindig Villeneuve in 'n teleurstellende 14de plek in die wêreldkampioenskap tydens sy eerste seisoen by Sauber. Toe hy in 2006 in die Duitse Grand Prix vir 'n ongeluk beskuldig word, besluit Villeneuve om uit die span te bedank, omdat BMW die jaer Robert Kubica vir drie renne wou toets. Vroeg in 2007 maak hy bekend dat hy vir Peugeot in die Le Mans 24-uur sal jaag.
In Februarie 2007 maak Villeneuve bekend dat hy permanent na sy geboorteland, Kanada, gaan terugkeer.
Villeneuve neem op 8 Oktober 2007 aan sy eerste NASCAR-ren op die Talladega-baan deel in 'n UNICEF-geborgde Toyota. Hy spring laaste weg al het hy beter gekwalifiseer, om nie in die weg te staan van die ervare jaers nie. Desondanks eindig hy 21ste van die 43 jaers.
In 2015 keer Villeneuve terug na 'n volledige kampioenskap, toe hy in Formule E vir die span "Venturi Grand Prix" jaag.
