Kersefontein

Kersefontein is ‘n plaas van historiese belang in die Sandveld.

Die plaas is by die koördinate 32° 54′ suid en 18° 46′ oos. Dit is aan die oewer van die Bergrivier en ‘n 20 km van Hopefield.

Reeds in 1744 het die VOC die plaas aan Johannes Mijndertsz Cruywagen toegeken. Op 13 Augustus 1770 word Martin Melck die eienaar en tans is die agtste geslag van die Melck-familie in beheer. In die beginjare was die plaas ‘n uitspanning vir reisigers onderweg na en van die binneland.

Die kern van die huis dateer waarskynlik uit 1770 (aldus die jaartal op die gewel). Aan die besondere gebouekompleks is verskeie male ver- en aangebou. Buiten die slaweklok is daar op die werf stalle, ‘n waenhuis, smidswinkel, bakkery, koringskuur, koetsiershuis en gastekamers. In 1953 is die Kaaps-Hollandse gewel gerestoureer en is dit ‘n duidelike nabootsing van die gewel op die geskiedkundige plaas Elsenburg buite Stellenbosch. Dit is gemeubileer met antieke Kaapse meubels. Die opstal en die plaas is tot monument verklaar.

Aanvanklik is hier met Arabierperde geboer en het jaarliks ‘n veiling van reisiesperde plaasgevind. Later is met Afrikanerbeeste, Boerperde en muile en op nog ‘n later tydstip met Hereford- en Friesbeeste, Merinoskape en koring geboer. Tans is die hoofhuis as gastehuis ingerig.

Die oorspronklike naam van die plaas was Karse Fontein. Blykbaar was dit weens die baie wilde kersies wat hier groei.

• capetownlegends.com/legend/julian-melck/
• Fransen, Hans (samesteller): A guide to the old buildings of the Cape. A survey of the extant architecture from before c.1910 in the area of Cape Town, Calvinia, Colesberg, Uitenhage. Kaapstad: Jonathan Ball, 2004. ISBN 1-86842-191-0
• westerncape.gov.za/other/2010/11/provincial_heritage_sites_2002_09_19_-_old_national_monuments.pdf
• www.kersefontein.co.za