Mitsubishi A6M Zero
| Mitsubishi A6M Zero | |
|---|---|
 | |
| Tipe | Vegter |
| Vervaardiger | Mitsubishi |
| Bekendstelling | 1940 |
| Onttrek | 1945 |
| Status | 1× Nakajima Sakae 12 radiaalmotor |
| Hoofgebruiker | Japan |
| Aantal gebou | 10 939 |
Die Mitsubishi A6M Zero (Japannees: 零式艦上戦闘機, rei-shiki-kanjō-sentōki), Geallieerde kodenaam Zeke, was 'n vegvliegtuig van die Japannese Keiserlike Vloot tydens die Tweede Wêreldoorlog. Die Zero's, gestasioneer op Japannese vliegdekskepe en op land, was gedugte teenstanders vir die Amerikaanse vlieëniers, geallieerde skepe en landteikens in die Stille Oseaan.
Die Zero se taktiese voor- en nadele
[wysig | wysig bron]Die A6M Zero het vir die Geallieerdes as 'n volkome verrassing gekom. Terwyl hulle oortuig was dat Japannese vliegtuie slegs minderwaardige namaaksels van hul Westerse eweknieë was, was hulle eensklaps gekonfronteer met 'n beter vegvliegtuig, wat die Weste op byna alle vlakke oortref het.
Die Japannese het twee vlugeienskappe van groot belang geag: spoed en beweeglikheid. Eers daarna kyk mens na vuurkrag en wapens. Tydens skermutselinge met sy Amerikaanse eweknieë blyk die Zero vinnig en uiters beweeglik te wees, met 'n sterk klimvermoë. Boonop het dit oor 'n groot reikafstand (3 100 km) beskik en kon swaar wapentuig dra: masjiengewere én aanboordkanonne, benewens tot 200 kg se bomme.
Aan die begin van die stryd in die Stille Oseaan en in Suidwes-Asië het die Zero oor die lugruim geheers. In die aanloop tot die Slag van Midway het die Amerikaners daarin geslaag om 'n neergeskiete Zero voor die neus van 'n Japannese duikboot weg te raap. 'n Tegniese ontleding het sy swakpunte aan die lig gebring en geallieerde vlieëniers het spoedig geleer hoe om dit uit te buit. Die twee gebreke was: onvoldoende beskerming vir die vlieënier asook die brandstoftenk, en 'n taamlik ligte konstruksie, wat beteken het dat die Zero weinig gevegskade kon verduur en ook maklik aan die brand geslaan het.
Tydens luggevegte moes die Grumman F4F Wildcats net verseker dat geen Zero's agter hul inkom nie. Die Wildcat was minder beweeglik, maar die vlieënier was beter beskerm teen koeëls. Menige Wildcat kon gehawend en deurspek met koeëlgate land, omdat hulle 'n sterker konstruksie as die Zero's gehad het.
Sien ook
[wysig | wysig bron]
 | Hierdie lugvaartartikel is 'n saadjie. Jy kan Wikipedia help deur dit uit te brei. |
| Hierdie artikel is in sy geheel of gedeeltelik vanuit die Nederlandse Wikipedia vertaal. |
