Core22

Core 22 isch e Pop- und Rock-Band us de französischsprachige Schwiiz, wo ursprünglich under em Name Core bekannt worde isch.

Core, so hätt d'Band damals no gheisse, isch 1994 vo de Frontfrau Sonja Heller, em Guillaume Desboeufs, em Dick Sunday, em Claude Müller und em Yann Roullier z'Genf gründet worde.

Nach de erste veröffentlichte Single Easy Gun isch 1996 s erschte, rockige Debutalbum Transformer usecho. I de düütsche Alternativ-Charts isch s'Album grad uf Platz 4 glandet, und isch europawiit als hoffnigsvolli Newcomer-Band bezeichnet worde.

Mit em zweite Album, Not Your Size, isch Core 1997 denn au ide USA verallem dur d'Single Crocodile ide amerikanische College-Radiostatione bekannt worde.

Trotz de viele Erfolg wome scho het chöne verzeichne, isch de ganz grossi Durchbruch bis jetzt uusblibe. Zudemm het sich Core vom Gitarrist Dick Sunday trennt. Drumm het d'Plattefirma Marlboro Music umbedingt "radiotauglicheri" Songs brucht. 1998 het Core ihres dritte Album, Hold Your Breath ufgnoh. D'Singeluuskopplig Dive Into The Ocean isch en kommerzielle Erfolg gsi, me het d Forderige vo de Plattefirma chöne umsetze. Allerdings het sich Core lang gweireret, de Hitsong Dive Into The Ocean live z'spiele.

Gmeinsam mit em britische Produzänteduo Eskimo & Egypt het Core 1999 es Remix-Album, -Core vs. BiggBugg - Out Of Manchester usebracht. Die CD het Songs us de erste drüü Albe enthalte. Endi 1999 het sich Core möse uf de hüttigi Name Core 22 umändere, will's e amerikanischi Band 'gä hät, wo de Name scho länger gha het. Me het sich denn schliesslich uf de Name Core 22 g'einiget.

Nachdem sich Core 22 fasch trännt het, isch im 2001 di neui CD Massive Love, mit 13 melancholisch-sphärische Rock-Songs, erschiene. Bis jetzt eidüütig s'beschte Album, au i Fachkritike isches guet ewäg cho. Usserdem het me grosse Erfolg mit de Single Sorry gha. Mit dem Album isch Core 22 uf e zweijährigi Tournee gange.

Im Jahr 2003 hät me hüüfig di zwei neue Songs Fly und Coz I Need U am Radio ghört. Es sind eher ruhigeri, weniger rockigeri Songs, wie au fascht alli andere Songs, wo denn im Februar 2003 ufem Album Nuance verchauft worde sind.

Im Mai 2004 isch s Best-Of-Album Replay zum 10-Jährige Jubiläum vo de Band usecho, druf sind 22 Hits us de erschte 10-Jahr Bandgschicht.

Im Früelig 2006 isch denn s neue Studio-Album KillerLoveAngel erschiene.

• 1996: Transformer
• 1997: Not Your Size
• 1998: Hold Your Breath
• 1999: Core vs. Bigg Bugg - Out Of Manchester
• 2001: Massive Love
• 2003: Nuance
• 2004: Replay
• 2006: Killer Love Angel