Mars (Planet)

Dä Artikel beschäftigt sich mitem Planet Mars; anderi Bedütige vu dem Begriff findener under Mars (Begriffsklärung)

De Mars (Sümbool: ) isch, vu de Sunne us gsähne, de viert Planet in unserem Sunnesystem. Er zellt zue de erdähnliche (terrestrische) Planete. Ufgrund vu sinere bluetrote Farb isch er nochem römische Chriegsgott Mars bnennt worre un wird oft au als de Rot Planet bezeichnet. Symbolisiert wird de Mars dur e Chreis miteme Pfiil wo schräg noch rechts obe zeigt. Säll Zeiche, wo e Schild mitem dehinder stohende Speer darstellt, stoht fer de Chriegsgott. In de Biologi symbolisiert da Symbol s'männlich Gschlecht.

De Mars bsitzt zwä zimli chlaini, uregelmäßig gformti Mond, Phobos un Deimos (griech. "Furcht" un "Schrecke"), in de Mytholigi d'Söhn vum grichische Chriegsgott Ares, wo im römischen Mars glichgsetzt isch.

Wäge sinere rote Färbig het de Mars scho immer d'Mensche fasziniert. D'Färbig selber verdankt de Planet Iiseoxid-Staub, wo sich uf de Oberflächi un in de Atmosphäre verdeilt het. Somit isch de Mars e „rostige“ Planet.

Geologischi Gschicht

D Dichti vo de Iischlagkrater ufem Mars ermöglicht drai geologischi Periode z bistimme, well ältiri geologischi Formatione mee Krater uufwiised, as jüngeri. Die Periode sind noch Gegete ufem Mars binennt. Allerdings isch e gnaui zittlichi Bistimmig nöd mögli. Di drai Epoche sind:

Noachischi Epoche (noch de Noachis Terra binennt): Si bildet di ältiste Oberflächine uf em Mars und sind öppe 4,6 bis 3,5 Milliarde Joor alt. Noachischi Piet wiised vill groossi Krater uuf. Au de grööst Krater, d Hellas Planitia ghört dere Epochen a.
Hesperischi Epoche (binennt noch em Hesperia Planum): Si isch rund 3,5 Milliarde bis 1,8 Milliarde Joor alt. Zu de Hesperischie Piet ghöred vill wiiti Lavaebine. S werd agnoo, ass de Olympus Mons i dere Epoche aktiv woren isch.
Amazonischi Epoche (noch de Amazonis Planitia binennt): Si het vo 1,8 Milliarde Joor agfange und duured bis hütt. Amazonischi Regione wiised wenig Krater uuf, woll aber anderi geologischi Strukture.