Galasso I Pio

C'l artìcol chè 'l è scrit in Carpśàn

Al Galàs I Pio (? - Chèrp, 13 ed mèrs 1367) 'l era al fiōl màsć dal prìm sgnōr ed Chèrp al Manfrēd, e al gh'era sucedû in dal guèren dla sitê. Apèina andê sù, al Galàs al dà 'l incàreg ai carpśàn ed scrìver e 'd mèter órdin ai Statût Cumunêl in dal 1352.
Prìma amìg di Estèins ed Mòdna, ch'al vlìva anca mantgnìr la stèsa pêś ed só pèder cun 'l Obìs 'd Este, mo però a la mort ed chilò, al n'gh'la chèva mìa ed dvintèr amìg c'n al só sucesór in Mòdna, 'l Aldubrandèin 'd Este, e dòunca présti al làsa i Mudnéś per mèt'r-es da la pert di Viscòunt ed Milàṅ, ch'i éren inimìg ed chî èter là. El lît, i dispèt, el batàj, i n'mànchen, e anca i Este i vìn'n a Chèrp a devastèr fer e fóg. Incòri, in na batàja a Piumàs, la sort la nn'è mia da la pert dal Galàs e chilò al gh'à da céder ai Este al Castèl ed Campgajàn.
Al Galàs al mór in dal 1367 e cun la mujér Beatrîs dl Albèrt da Curèś al gh'ìva avû sêt fiō: al Jàcop, al Tadèo, al Ludvîg, l'Ursulèina, al Gibèrt, al Marsìli e 'l Antóni. Sól al Gibèrt e 'l Marsìli i gh'sucedaràn in dal guèren 'd Chèrp.

Colegamèint estèren

Noti