The Box
|
C'l artìcul chè 'l è scrit in
Miranduléś |
 The Box
| ||
| The Box | ||
 Marsden e la Cameron Diaz in na figùra dal film | ||
| La scatla 2009 | ||
|---|---|---|
| Regìa: Richard Kelly | ||
| Scritōr: Richard Matheson • Richard Kelly | ||
| Atōr: Cameron Diaz • James Marsden • Ian Kahn Frank Langella • Deborah Rush • James Rebhorn Holmes Osborne • Sam Oz Stone • Gillian Jacobs Celia Weston • John Magaro • Andrew Levitas | ||
| Müsica: Régine Chassagne Win Butler • Owen Pallett | ||
| Léngua: Ingléś | ||
| Dürä dal film: 115 minüt | ||
| Nasiōṅ: Stat Unî | ||
The Box (La scatla) 'l è 'n thriller fantàstic americàṅ dal 2009 ad Richard Kelly trat da 'l racònt “Button, Button” dal 1970 ad Richard Matheson, bèla purtâ in si schérum televiśìṿ in 'n epiśòdi dla série Ai confini della realtà.
Custâ trénta migliòṅ ad dòlar, la pelìcula la 'n à purtâ a cà trénta-tri a 'l incìrca.
Sunt
Arthur Lewis (James Marsden) e la Norma (Cameron Diaz) i èṅ na còpia ch'la viṿ a Richmond in Virgìgna. Lò al lavóra a la Nasa, lē la fà l'insgnànta 'd létri e la gira sòpa parchè l'à patî l'amputasiòṅ ad quàtar dida in un pē. I dū i fa�� fadìga a sbarcàr al lunàri e i gh'aṅ un ragasōl ch'al s ciàma Walter (Sam Oz Stone).
Un dè i ricév'n un pachét misterióś cun dèntar 'n aparéć dimóndi strân c'n un butòṅ rós quaciâ da na campàna 'd vēdar. Di bijét a n gh 'n è minga e a n s capìs briśa cuśa 'l sarvìs. La matìna dòp a Arthur a gh riva n'arcmandàda in dua a gh'è scrit ch'al n pōl mia dvintàr 'n astrunàuta, al sógn dla sò vita, parchè al n à minga pasâ i tèst psiculògic. In cal méntar anc sò mujér la gh'à dal bruti nutìsi a scōla parchè i gh tajàn via i fónd par far studiàr sò fiōl.
Al dopmèśdè dòp la Norma la vèra 'l us ad cà a 'n óm ch'al diś ad ciamàr-as Arlington Steward (Frank Langella): 'l è lò ch'al gh'à cunsgnâ 'l pac. Al vèć, ch'al gh'à la ghigna scavśàda parchè a gh manca mèś la ganàsa par via dna bruśadùra, al gh fà na prupòsta in dal méntar ch'al gh śibìs la ciàṿ par vèr'r al vēdar. Se lē la decìd ad schisàr in dal gir ad vint-quat'r óri al butòṅ, un qualchidòṅ da na quàlc banda al murirà ma lē la s mit'rà in bisàca al migliòṅ ad dòlar ch'a gh'è dèntar la valìś ch'al gh fà védar. Al dè dòp, a sinc óri dla basōra, lò al turnarà a cà sua par tōr indrē 'l aparéć e par dar-'g in dal caś i bèsi. Se invéci al butòṅ a n sarà minga schisâ, lò al śibirà al stés quèl a n'atra famìja. P'r avèr i bèsi però a n gh'è da dir gnint a ninsòṅ.
Al dè dòp, quànd a gh cala 'n quàrt 'd óra a sinc óri, la Norma la 'l schisa parchè i bèsi i gh fànan còmad e in cal méntar un dipendènt dla Nasa al spara 'n cōlp a sò mujér cupànd-la. Arlington al s fà viṿ e al dà la valìś a i Lewis. Chi lōr dū i vrévan dar indrē incòsa ma 'l vèć al gh diś ch'l è tròp tard e al s in và. Cuśa gh sia sóta 'l è impusìbil da capìr, a s véd sōl che 'l óm misterióś al sà sèmpar tut qvél ch'a sucéd in gir, anc che Arthur al s è mis a indagàr in sal sò cònt dòp avér tòlt śò la targa dla sò màchina.