Ainm.ie
| URL | https://www.ainm.ie  |
|---|---|
| Cineál | suíomh gréasáin agus foclóir beathaisnéiseach |
| Príomhábhar | Muintir na hÉireann |
| Teanga | an Ghaeilge |
| Cur i seirbhís | 1 Samhain 2011 |
| Tír | Éire |
Is tionscadal beathaisnéisí Gaeilge ar líne é Ainm.ie atá á fhorbairt ag Fiontar, Ollscoil Chathair Bhaile Átha Cliath ón mbliain 2009 i leith. Is mórshaothar léinn é seo a chuimsíonn breis is 1,800 beatha (in 2023) ón mbliain 1560 ar aghaidh (beathaisnéis fir atá i gceist le 90% de na beathaisnéisí atá ar an suíomh in 2023). Tá 1.3 milliún focal i gcló sa bhunsaothar.[1][2]
Stair
[cuir in eagar | athraigh foinse]Tá ainm.ie bunaithe ar taighde a rinne Diarmuid Breathnach (nach maireann) agus Máire Ní Mhurchú, bunúdair na sraithe '"Beathaisnéis" a d’fhoilsigh An Clóchomhar i naoi n-imleabhar (1986–2007), saothar a áirítear ar cheann de shárshaothair taighde na Gaeilge. Bhí fúthu dúshlán an Dictionary of Irish Biography a thabhairt maidir le beathaisnéisí na nGael.
Tháinig Beathaisnéis a hAon[3] amach sa bhliain 1986, agus an leabhar deireanach sa sraith, Beathaisnéis a Naoi,[4] in 2007. Ba mhinic go dtí sin gurbh é inseacht an Bhéarla agus na mBéarlóirí a rinneadh ar stair na tíre agus ar na daoine a bhí lárnach sa stair sin. Ach chúitigh Beathaisnéis an fhaillí sin. Tá na beathaisnéisí go léir le fáil ar an suíomh ainm.ie inniu.
B'iad Mártan Ó Ciardha, Máire Zepf, Gráinne Ní Mhuirí, Seán Mac Labhraí agus Lillis Ó Laoire a sholáthair na cuntais ar ainm.ie sa bhliain 2024.[5]
Thug an Roinn Gnóthaí Pobail, Comhionannais agus Gaeltachta maoiniú do dhigitiú an ábhair, a bhí ina céim thosaigh de chuid an tionscadail ainm.ie
Saoráidí ar an suíomh
[cuir in eagar | athraigh foinse]- Liosta aibítreach na mbeathaí
- Córas cuimsitheach crostagartha idir na hailt éagsúla
- Cuardach lántéacs sofaisticiúil ar eochairfhocail agus ar fhrásaí
- Amlíne
- Gnéithe saoil (eagraíochtaí, saothair, logainmneacha, tarlúintí, gradaim is mar sin de.)
- Beatha roghnaithe na seachtaine
Dar le muintir an tsuímh, cuirfear beathaí nua leis an suíomh de réir mar a chuirfear ar fáil iad agus déanfar seanbheathaí a nuashonrú de réir mar a thiocfaidh fianaise nua chun solais. Cuirfear leis na saoráidí cuardaigh agus brabhsála ar an suíomh ar bhonn leanúnach.
Conspóid
[cuir in eagar | athraigh foinse]Dúirt Fiontar in 2019 go raibh ganntanas ban ar an mbunachar ach go raibh líon na mbeathaisnéisí faoi mhná a bhí ar an suíomh “ag dul in airde, más go mall féin é.” Cé go bhfuil ardú tagtha ar líon na mbeathaisnéisí faoi mhná ar an suíomh in imeacht 2019-2023, fágann an t-ardú atá tagtha ar líon na mbeathaisnéisí faoi fhir nach bhfuil aon ardú suntasach tagtha ar chéatadán na mban ar Ainm.ie.[6]
Féach freisin
[cuir in eagar | athraigh foinse]Tagairtí
[cuir in eagar | athraigh foinse]- ↑ Is é sprioc an tionscadail rochtain éasca ar an taisce eolais seo a dheimhniú trí dhigitiú an ábhair bhunaidh agus é a fhoilsiú ar líne.
- ↑ Seoladh an t-iomlán ar an suíomh poiblí Ainm.ie sa bhliain 2011.
- ↑ Diarmuid Breathnach, Máire Ní Mhurchú. "1882-1982: Beathaisnéis a hAon". Baile Átha Cliath: An Clóchomhar, 1986.
- ↑ "Beathaisnéis a Naoi | Litríocht" (en-GB). Dáta rochtana: 2023-11-18.
- ↑ "Cuntas beathaisnéise seachtar Gael eile curtha le ainm.ie" (ga-IE). Tuairisc.ie (2024-10-24). Dáta rochtana: 2024-10-24.
- ↑ Maitiú Ó Coimín (2023-05-24). "Gan aon athrú ar chéatadán na mban ar Ainm.ie tar éis ceithre bliana" (ga-IE). Dáta rochtana: 2023-06-05.
Naisc sheachtracha
[cuir in eagar | athraigh foinse]- Beathaisnéisí Gaeilge, Beathaisnéisí Gaeilge leathanach baile