Ariana DeBose

Ariana DeBose

Biografía
Nacemento	25 de xaneiro de 1991 (33 anos) Wilmington, Estados Unidos de América
Educación	Wake Forest-Rolesville High School (en) Western Carolina University (en)
Actividade
Campo de traballo	Actuación e música
Ocupación	actriz, cantante, bailarina
Período de actividade	2009 -
Premios
(2022)  Time 100 (2022)  Q110849597 , premiado polo traballo West Side Story (2021)  Globo de Ouro á mellor actriz secundaria, premiado polo traballo West Side Story (2021)  Out100 (en)  Óscar á mellor actriz secundaria, premiado polo traballo West Side Story

Ariana DeBose, nada en Wilmington, Carolina do Norte, o 25 de xaneiro de 1991, é unha actriz, cantante e bailarina estadounidense. Na 94ª edición dos Premios Oscar, gañou unha estatuíña á mellor actriz secundaria, e máis tamén un premio BAFTA, un Globo de Ouro e o Premio da Crítica Cinematográfica, igualmente na categoría de actriz secundaria, polo papel de Anita na adaptación cinematográfica de West Side Story, dirixida por Steven Spielberg en 2021.

DeBose naceu en Carolina do Norte. A súa nai, Gina DeBose, é profesora.^[1] DeBose aprendeu danza no CC & Co. Dance Complex de Raleigh, Carolina do Norte.^[2] O seu pai é afroportorriqueño e a súa nai é branca. DeBose dixo: "Eu preséntome como negra e teño ascendencia afroamericana, mais tamén son en parte italiana".^[3]

DBose foi descuberta en 2009, cando participou no reality show So You Think You Can Dance, chegando ao "Top 20".^[4] Máis tarde, apareceu na novela One Life to Live e interpretou a Inez na produción do North Carolina Theatre de Hairspray antes de ser contratada para o papel de Nautica na produción de Bring It On do Alliance Theatre de 2011. Tamén apareceu no elenco da produción da Orquestra Filharmónica de Nova York de Company, que foi filmada para a televisión.^[5] No final de 2011, Bring It On comezou unha xira nacional polos Estados Unidos. DeBose continuou o seu papel na produción de Broadway de 2012, e foi substituta da personaxe Danielle.

Co lanzamento da súa carreira, DeBose interpretou a Mary Wilson en Motown en Broadway en 2013 e como substituta do papel de Diana Ross. DeBose deixou a obra posteriormente para interpretar a Eponine nunha produción rexional de Les Misérables^[5] antes de volver a Broadway como unha nobre e xogadora no musical Pippin e substituíndo a protagonista, papel que acabou por asumir durante un curto período en 2014.^[5]

DeBose deixou Pippin para aparecer como Bullet no espectáculo off-Broadway Hamilton no inicio de 2015. O show pasou a Broadway no final daquel ano e converteuse nunha súpeta sensación. Foi candidta ao premio Astaire pola súa danza na obra.^[6]

DeBose deixou Hamilton en xullo de 2016 e fixo unha aparición especial na serie de televisión Blue Bloods como Sophia Ortiz, e protagonizou como Daphne o filme de suspense Seaside. Volveu a Broadway en novembro de 2016 como Jane en A Bronx Tale ata agosto de 2017.^[7] Tamén presentou o correspondente vlog de Broadway.com, Bronx Bullet, durante oito semanas.^[8]

DeBose pasou a interpretar o papel de Disco Donna en Summer: The Donna Summer Musical en San Diego no La Jolla Playhouse no final de 2017. Repetiu o papel en Broadway, estreándoo en abril de 2018.^[9] Recibiu unha candidatura ao Tony de 2018 á mellor actriz de musical.^[10] Tamén apareceu con frecuencia no 54 Below.

DeBose interpretou a Alyssa Greene na adaptación cinematográfica de The Prom e a Anita na adaptación cinematográfica de 2021 de West Side Story.^[11] Por este último papel recibiu o Óscar á mellor actriz secundaria.

En febreiro de 2021, anunciouse que interpretaría a Kira Foster no filme I.S.S.^[12][13]

• Páxina oficial Arquivado 14 de decembro de 2021 en Wayback Machine.