Suttka chem Pustok
| |
Romi
|
|
Suttka chem Pustok
[बदल]Exodus
Gulamponn ani piddnuk sostale porjechi SUTTKA Pentateukachea hea dusrea pustokant amkam mellta. EXODOS, hea Grik utracho orth mhollear bhair kaddop / sorop. Israel porjeche itihasik soddvonnecho mahavir mhollear Sorvespor Dev (Yahweh) "Ejiptantli, gulamponnachea desantli Israel porjek bhair kaddla to Sorvespor Dev' (Sutt. 20/2; 5/6) He vhodd virkothen Yahwe ani Faraoh modem ek vhodd loddai ani zhuz cholta. Darunn ani krur monis-bollak, Sorvespor Dev fuddo korta ani Ejiptachea nixttur razacher To zoit vhorta. Israelachem gulamponn, dha khasti, Tambddea doriantlean ojapvont pask . utarop : he mhkhel bhag te vhodd suttkeche.
Tea bhair, hea Pustokant Sinai dongrar kel’lea Korarache sthapnnechi khobor amkam spoxtt zata. Ho korar Israelachea ak’khea Itihasant ek mullavi ani mukhel ghoddnni. Tiche sorbhonvtim Israelachem ak’khem nivit, zaum dhormik, somajik, otmik, sonvskrutik ani rajkaronnik, gunvta ani vhaddot veta. Sinai dongrachea Korara udexim Israel Devachi Porza zata ani Sorvespor ticho Dev zata.
Dha updes (Somurt) ani dusre nem’-kaide hea korarant atthaplole asat, Apnnak soddoilolea Devak Israel porza sodanch raji ani dhin’vaxi ravunk zai, Yahweh, Israelacho Dev, soimbachea ghoddneamnim, nhoi mhonn sevadhormik ritimnim punn tanchea itihasachea gombhir somajik-rajkaronnik poristhitint to Ap-uktavnni korta. Tika favo mhonn nhoi punn Aplea khud udhar mogan, visvaxi Dev Aplea Korarachea sombondant Israelak bhitor sorunk apoita. Korara vorvim sogllim Israelitkaram eka-mekachim bhav-bhoinnam, Moizesak dixtti poddlolo Dev, ek soddvonnar Dev, “Hanv To Hanv” (Sutt, 3/14), Dublleam- goribancho, piddnnukechea bhara khal cheploleancho Dev To, Taka sodanch neai-nit ani promanikponn zai, On’nea-oniticho To dusvas / dves korta. To patkeank khast laita khoro, punn tech borabor To doiall-movall, dulob ani konvallo, To bhogxita ani novo bhorvanso dita ! To Apunn suttka dita punn teach borabor aplea soddvonechea vaurant mon’xak vapurta.