Libor

ლიბორი (ინგლ. London Interbank Offered Rate) — ლონდონის ბანკთაშორისი შეთავაზების ინდექსი. ლიბორი არის ბანკთაშორის სესხებზე საშუალოშეწონილი საპროცენტო განაკვეთი, წარმოდგენილი ლონდონის საერთაშორისო ბირჟაზე მონაწილე ბანკების მიერ სხვადასხვა ვალუტითა და ვადით (ერთიდან 12 თვემდე).

ლიბორის ინდექსი ფიქსირდება ყოველდღიურად 1985 წლიდან, დასავლეთ ევროპის დროით დილის 11 საათზე, ბრიტანეთის საბანკო ასოციაციის ^[1] მიერ, შერჩეული ბანკების მიერ წარმოდგენილ მონაცემებზე დაყრდნობით.

ლიბორის ინდექსი დაინაგარიშება 10 სხვადასხვა ვალუტაში:

• ავსტრალიური დოლარი;
• დანიური კრონი;
• აშშ დოლარი;
• ევრო;
• კანადური დოლარი;
• ახალზელანდიური დოლარი;
• გირვანქა სტერლინგი;
• შვედური კრონი;
• შვეიცარული ფრანკი;
• იაპონური იენა.

ინდექსის დაფიქსირება ხორციელდება შემდეგნაირად:

ბრიტანეთის საბანკო ასოციაციის უფლებამოსილი/ავტორიზებული აგენტი – „თომსონ როიტერის სააგენტო“ დასავლეთ ევროპის დროით დილის 11 საათზე უკავშირდება 16 პირველი კლასის ბანკს (Prime banks), შერჩეულს როგორც კომპანიებს, რომლებსაც გავლენა აქვთ ლონდონის ფულად ბაზარზე და ეკითხება 1 თვიდან 1 წლამდე შეთავაზებულ საპროცენტო განაკვეთების კვოტირებას (ფასების გამოცხადებას). თითოეული პერიოდისათვის მიღებული 16 მონაცემიდან ოთხი ყველაზე მცირე და ოთხი ყველაზე დიდი მაჩვენებლის გამორიცხვით, მიღებული მონაცემებით დაიანგარიშება საშუალო არითმეტიკული, რომელიც ქვეყნდება როგორც ლიბორის ინდექსი შესაბამისი პერიოდით და ვალუტით.

საქართველოში ლიბორის ინდექსზე დაფუძნებული სესხები გაიცემა ბანკი რესპუბლიკის მიერ ^[2].

ბრიტანეთის საბანკო ასოციაციას გახსნილი აქვს სპეციალური საიტი ლიბორისათვის – bbalibor.com.

მიმდინარე აქტუალური განაკვეთის ნახვა შეიძლება ამ გვერდზე.

1. ↑ ბრიტანეთის საბანკო ასოციაციის გვერდი. დაარქივებულია ორიგინალიდან — 2019-12-24. ციტირების თარიღი: 2012-09-19.
2. ↑ „მოქნილი“ იპოთეკური სესხი დაარქივებული 2013-09-09 საიტზე Wayback Machine. .