Arosia

Arosia^[1] (Suecice Västerås), vel nomine antiquo Arosia Occidentalis (Västra Aros),^[2] est urbs maxima et caput provinciae hodiernae administrativae Vestmanniae, necnon sedes episcopalis Ecclesiae Suecicae. Inter urbes Sueciae magnitudine quinta est. Numerus incolarum regionis urbanae Arosiae circiter 129 000 anno 2020 erat, secundum Curiam Centralem Statisticam Suecicam (Suecice Statistiska Centralbyrån).^[3]

Arosia, una ex vetustissimis urbibus Sueciae et Europae Septentrionalis, nomen trahit ab antiquo Arosia Occidentalis (Suecice Västra Aros), quod significat ostium fluminis Svartån. Regio iam ante annum 1000 a Viccingis habitabatur. Saeculo undecimo ineunte, Arosia urbs secunda magnitudine in Suecia erat et saeculo duodecimo sedes episcopalis facta est.

Historia

Prope urbem invenitur Anundshög, maximus tumulus sepulcralis Sueciae, qui circa annum 500 exstructus est. Nomen tumuli ab antiquo verbo Nordico haugr, quod significat cumulus, derivatur. Tumulus latitudinem 68 metrorum et altitudinem 9 metrorum habet.

Saeculis duodecimo et tertio decimo, ecclesia cathedralis Gothica et monasterium aedificata sunt. Ecclesia, a Birgero Iarl exstructa et anno 1271 consecrata, saeculo undevicesimo renovata est. Insignia urbis exeunte saeculo tertio decimo creata sunt. Arx urbi imminet, quam rex Gustavus I cepit et refecit; ibi Ericus XIV ab anno 1573 ad 1575 captivus tenebatur.

Gustavus I Arosiae comitia (Suecice Riksdag) convocavit, ubi decretum est ut Suecia Protestans fieret et potestas Ecclesiae Catholicae minueretur. Anno 1623, Iohannes Rudbeckius antiquissimum gymnasium Sueciae, nomine Rudbeckianum, Arosiae condidit.

Saeculis XVIII et XIX, Arosia nota facta est propter culturam cucumerum, unde cognomen "Urbs Cucumeraria" (Suecice Gurkstaden) ortum est.