Taroci
La taroci es un paceta de cartes per jua, usada de la sentenio 15 media en partes de Europa per juas como tarocchini en Italia, tarot en Frans, e konigrufen en Osteraic, multe de cual ancora juada oji. En la sentenio 18 tarda, alga pacetas ia comensa es usada como un tende per divina ritual par leje la cartas, cual resulta en pacetas desiniada per tal intendes oculta.
Como cartes comun, la taroci ave cuatro familias cual varia par rejion. Cada familia ave 14 cartes: 10 con puntos de un (la as) a des e cuatro cartes real (la re, rea o dama, cavalero, e pajo). Plu, la taroci ave un familia de 21 carte unica, usada como un familia de trumfo, e un carte singular nomida la fol. Dependente sur la jua spesifada, la fol pote es la trumfo la plu alta o pote es usada per evita segue familia. Esta cartes es ancora usada tra Europa per juas de carte "normal" sin la asosias oculta.
En paises de parlores de engles do esta juas no es frecuente juada, cartes taroci es usada xef per diverti e intendes de divina, tipal con pacetas spesial desiniada. Alga fanes alega ce la taroci ave sua orijinas en Egipte antica, la Cabala, Tantra de India, la Yi Jing de Xina, etc, an si no confirmas de estas esiste. Plu, la usa de taroci per divina no ia aveni ante la sentenio 18!
La parola taroci deriva de la italian tarocchi, la orijina de cual no es serta, estra ce la parola taroch ia es usada como un sinonim per folia en la sentenios 15 tarda e 16 temprana. La pacetas ia es conoseda como trionfi en la sentenio 15, cual ia es la orijina de la parola "trumfo". La nom nova ia apare prima en Brescia sirca 1502 como tarocho (la forma singular de tarocchi en italian). Tarocco en italian moderna refere a un varia de la fruta orania sanguin.
Cartes per jua ia entra Europa prima en la sentenio 14, probable de Egipte mamluc, con familias de bastones, monetas, spadas, e copas. Esta ia es simil a la familias de taroci moderna, e es ancora usada en pacetas tradisional italian, espaniol, e portuges.
La pacetas prima documentida ia es notada entre 1440 e 1450 en Milan, Ferrara, Firenze, e Bolonia, cuando cartes plu con imajes alegorial ia es ajuntada a la pacetas normal de cuatro familias. La documenti la plu temprana de cartes trionfi es en un nota en la arcivos de corte de Firenze en 1440, regardante la pasa de du pacetas a Sigismundo Pandolfo Malatesta.
La cartes de taroci survivente la plu vea es la 15 de Visconti-Sforza, depintada en la sentenio 15 media per la renores de la Duxia de Milan. Un paceta perdeda ia es encargada par Dux Filippo Maria Visconti e ia es descriveda par Martiano da Tottona, probable entre 1418 e 1425. El descrive un paceta de 60 cartes con 16 cartes con imajes de divines roman e familias de cuatro tipos de avias. Otra pacetas temprana cual ia ance mostra motifes clasica inclui los de Sola-Busca e la Boiardo-Viti de la desenio 1940.
Car la cartes taroci ia es depintada par mano, la cuantia de los produida es suposada como peti. Sola pos la inventa de la primador ce la produi en masa de cartes ia deveni posible. La estende de taroci estra Italia, prima a Frans e alora a Suiz, ia aveni en la Geras Italian. La motif la plu importante usada par Frans e Suiz ia es la taroci de Marseilles, cual ia orijina en Milan.
La intende orijinal de cartes de taroci ia es per juas. Un esplica corta de regulas per un paceta simil a la taroci ia es donada en un manoscrito par Martiano da Tortona ante 1425. Descrives neblosa de la regulas o termas ia segue per la sentenios seguente, asta la descrive conoseda la plu temprana de regulas per un varia franses en 1637.
La sentenio 18 ia vide la revive la plu grande de taroci, en cual lo deveni un de la juas de cartes la plu popular en Europa, juada a tota locas estra Er, Britan, Portugal, Espania, e la Balcanes Osmanan. La taroci franses ia vide un revive comensante en la desenio de 1970, e Frans ave la comunia de juores la plu forte. Juas taroci de rejiones ia es juada multe en Europa sentral, en la Impero Osteraic-Magiar de la eda.
La atesta la plu temprana de un paceta de taroci usada per intendes mistica veni de un manoscrito anonim de sirca 1750 cual inclui alga sinifias per divina con la cartes de la taroci bolonian. La populari de taroci mistica ia comensa con Antoine Court e Jean-Baptiste Alliette en Paris en la desenio de 1780, usante la taroci de Marseilles.
La arcana major ("secretas plu grande"), o cartes trumfo, es composada de 22 cartes sin familias:
| I. la majiste II. la pretesa alta III. la imperoresa IV. la imperor V. la ierofante VI. la amores VII. la caro VIII. justia IX. la eremita X. la rota de fortuna XI. fortia |
XII. la om pendeda XIII. moria XIV. modera XV. la diablo XVI. la tore XVII. la stela XVIII. la luna XIX. la sol XX. judi XXI. la mundo XXII. la fol |
Nota ce alga de esta ave nomes alternativa: pretesa = papesa, ierofante = pape, la tore = lampo. La fol no es tipal numerida, ma a veses lo es poneda a la comensa de la paceta como 0, o a la fini como XXII.
La arcana minor ("secretas min grande") es composada de 56 cartes, divideda entre cuatro familias de 14 cartes per cada familia:
- 10 cartes numerida de 1 (o as) a 10, e 4 cartes real, la re, rena (o dama), cavalero, e pajo.
- La familias tradisional - spadas, bastones, monetas, e copas (cual representa razona, la vole, la corpo e poseses, e emosias).
La termas "arcana major" e "arcana minor" ia es prima usada par Jean-Baptiste Pitois e es nunca usada en la juas taroci. La 3 pacetas la plu comun usada en taroci mistica es la taroci de Marseilles, la taroci de Rider-Waite-Smith, e la taroci de Thoth.
Aleister Crowley, ci ia crea la taroci Thoth con Seniora Frieda Harris, ia sujesta ce "La orijinas de esta paceta de cartes es multe oscur. Alga autorias atenta pone la orijina de la cartes tan distante en la pasada como la misterios de Egipte antica; otras atenta trae los a ante tan tarda como la sentenio 15 o an 16.... Ma la sola teoria de interesa ultima sur la Taroci es ce lo es un imaje simbolin amirable de la Universo, fundida sur la datos de la Cabala Santa.1"
1Crowley, Aleister (1969), The Book of Thoth, Weiser Books, Massachusetts.