Goa

Dit artikel is gesjreve (of begós) in 't Mofers. Laes hie wie v'r mit de versjillende saorte Limburgs ómgaon.

Goa (Konkani: गोंय goṃya; Marathi: गोवा govā) is 'n deilstaot van India, die ligk ane wèskus van 't Indisch Subcontinent. Kwa oppervlakdje (3.702 km²) is 't de klènste staot van India; 't tèltj zón óngerhalf miljoen inwoonders. De houfstad is Panaji.

Goa waas veur ieëvelang, van 1510 toet 1961, 'n klonie van Portugal en maakdje same mitte gebiede Dadra en Nagar Haveli deil oet van Portugees-Indië. Ouch waas 't de houfstad vanne Portugese klonieje in 't Wied Oeaste.

In Goa waere väöl spraoke gekaldj. De wichtigste zeen 't Konkani (de officieel spraok), Marathi, Hindi en 't Ingels. Door 'n klein minderheid wuuert nag Portugees gekaldj.

'n Mieëderheid van 65,8% is hindoeïstisch. d'n Invlood vanne Portugezen is aevel nag ummer good te mirken aan 't rilletief hoeag perzentaasj kristene (26,7%), veural roeams-katteliek.