Pletskeskook

Dit artikel is gesjreve (of begós) in 't Breuker. Laes hie wie v'r mit de versjillende saorte Limburgs ómgaon.

Pletskeskook is e saort gebak wat bekind is es 'n typisch Limburgs sjtrieëkgerech. Dizze kook waert kawd gemak en kawd gegaeëte. 't Gieëft versjeie recepte vuur dit gerech, meh 't haat ummer es gróndsjtof pletskes (thieëbiscuit), bótter, soeker en koffie.

De bótter, soeker en 'ne sjeut sjterke koffie waere gemengd tot 'n sjmierbaar crème. De pletskes waere kort in de rest van d'r koffie gedrenk en daonao i óngevier drie riekes va drie gelag en besjmierd mit e läögsjke van de bóttercrème. Hie baovenop kómme da nog óngevier zös va dees laoge pletskes mit bóttercrème pès 't de vorm va 'ne kook kriet. Es lètste waere de ziekante van d'r kook besjmierd en baovenop besjtruid mit hagelsjlaag.

Pletskeskook is vuural bekind i Limburg. Boete dees sjtrieëk gieëft 't aoch variante woebie d'r koffie vervange waert doer anger ingrediënte wie cacao. Dizze variant is in de res van 't land bekind es Arretjescake. D'r naam van dit gerech kump va Arretje Nof, e (sjtrip)figuur wat es reclaam gebroek woert vuur 't bóttermerk van de Nederlandsche Oliefabrieken (NOF).

Vergeliekbaar gebak is de Belsje krisbaomsjtam, de Italiaanse tiramisu en de Hongaarse Dobos-toert woebie aoch gebroek gemak waert va biscuitlaoge. Aevel is 't gebroek va pletskes uniek vuur dizze kook.