Tolozzi Editori

ZE	Quésta pàgina a l'é scrîta in léngoa zenéize A Grafîa adeuviâ a l'é quélla de l'Académia Ligùstica do Brénno

Tolozzi Editori
Stâto	Itàlia
Fondaçión	1919 a Zêna
Creâ da	Amilcare Tolozzi
Sêde prinçipâ	Pontrémoli
Persónn-e ciâve	Daniela Tolozzi (prescidénte)
Setô	Editoriâle
Wikidata · Info

Tolozzi Editori (ofiçialménte Tolozzi Editori - Libri dal 1919) a l'é 'na câza editôa fondâ a Zêna inte l'ànno 1919 e che, da-o 1993, a gh'à a seu sêde a Pontrémoli.

A câza editôa a l'é nasciûa do 1919 a Zêna, fondâ da l'Amilcare Tolozzi ch'o s'êa stramuòu chi da-a Lunigiànn-a a-a fìn da Prìmma Goæra Mondiâle. A-o coménso l'inpréiza a l'àiva a seu sêde into quartê de Sàn Vinçénso inta Stràdda di Sànti Giàcomo e Féipo e a l'êa 'na libràia d'antiquariâto, pe spàndise co-o ténpo inte de âtre bitêghe e, co-o fìggio Renzo, inandiâ l'ativitæ de câza editôa ascì^[1][2].

Co-o pasâ di ànni a Tolozzi a l'à mìsso insémme 'n catàlogo inportànte, con de grénde ediçioìn in sce di scrîti dedicæ a-argoménti de coltûa generâle còmme a stöia, l'architetûa, a giögrafîa e l'àrte, inclûzo a letiatûa e a poêxîa ascì, e ancón di volùmmi in scê matêie ligùsteghe e de nêuve ediçioìn de tèsti antîghi. Tra tùtte ste pubricaçioìn chi se peu aregordâ di travàggi de Francesco Maria Accinelli, Hortense Allart, Giovanni Boine, Enrico Bonino, Massimo Del Fante, Federico Donaver, Gianmario Filelfo, Mario Labò, Giuseppe Marcenaro, Giulio Miscosi, Amato Novelli, Cesare Orsini, Càrlo Giöxèppe Ràtto, Ceccardo Roccatagliata Ceccardi, Aidano Schmuckher, Ettore Serra, Rafè Sorvàn e Léo Taxil^[3][4][5]. Inte l'ànno 1967 l'é sciortîo 'na nêuva ediçión da Storia di Genova do Federico Donaver^[6][7] e a pubricaçión do Dizionario delle strade di Genova do Tomaso Pastorino, sciortîo prìmma inte 3^[8] e dòppo 5 volùmmi^[9]. A câza editôa a l'à pubricòu di giornâli d'atoalitæ e de coltûa ascì, cómme l'Elisse, ch'o sciortîva ògni doî méixi^[10].

Do 1954 l'Amilcare e o fìggio Renzo són stæti arestæ e inproxonæ pe chìnze giórni con l'acuzaçión de vénde di lìbbri contrâi a-o bón costùmme, p'avéi inta seu libràia 'na còpia do Gamiani, ou deux nuits d’excès, lìbbro do 1833 de l'Alfred de Musset^[1].

A câza editôa a l'é stæta tra i fondatoî do Premio Bancarella e, do 1958, o fondatô do seu prémmio pi-â letiatûa da figeu, o Bancarellino^{[11][12][13][14]}. A l'à pigiòu pàrte a-a creaçión do Premio Caffaro ascì^[7]. Da-o 1993, con l'inpréiza ch'a l'êa pasâ sott'a-a goìdda da Daniela Tolozzi, a sêde a l'é stæta stramuâ a Pontrémoli^[15].

Pàrte do materiâle òriginâle de Tolozzi in sciô Nichiôzo Paganìn a l'é stæta acatâ do 1957 da-a Gertrude Clarke Whittall Foundation Collection on Nicolò Paganini da Bibliotêca do Congrèsso di Stâti Unîi, ch'a-o consèrva ancón a-a giornâ d'ancheu^[16].

A-o Renzo Tolozzi, Zêna a gh'à dedicòu un di pàsci pedonâli into céntro da çitæ, into quartê de Picaprîa^[17].

• (IT) Claudio M. Messina, Guida ragionata alle librerie antiquarie e d'occasione d'Italia 2000, Biblioteca del Vascello, 2000, p. 108, ISBN 88-86-31223-7.
• (IT) Claudio M. Messina, Guida ragionata alle librerie antiquarie e d'occasione d'Italia, Robin Edizioni, 2003, pp. 131-132, ISBN 88-73-71004-2.
• (IT) Massimo Gatta, Librai e librerie di ieri e di oggi, Biblohaus, 2008, ISBN 88-95-84401-7.

• Wikimedia Commons a contêgne di files in sce Tolozzi Editori