Anticiclon

Quest articol chì l'è scrivuu in lombard, grafia milanesa.

I anticiclón hinn di struttùr che la soa pression atmosferega l’è tal che i curv isobar (cioè i curv a l’istèssa pressión atmosferega) o i isoipsi (curv a l’istèss geopotenzial), ch’a hinn ciùs e concentrich, gh’hànn di valór che vann su manemàn che de la periferia se va vèrs el dedenter indoe la pression la raggiòng el so valor màssim. ^[1]

I anticiclon hinn classificàa segond la sò posizion in:

• Anticiclon permanent (o sub-tropicaj): hinn quèj che se originen de la circolazion general de l'atmosfera intorna di 30-40° de latitudin; ^[1]

Per savenn pussee, varda l'articol Anticiclon permanent.

• Anticiclon mòbil (o de saradura): hinn piazzàa infra i ciclon mòbil; ^[1]

Per savenn pussee, varda l'articol Anticiclon mòbil.

• Anticiclon orografich: hinn quèj che se ingeneren sora-vent rispètt a ‘na cadèna montagnosa in presenza de vent trasversaj a la barriera orografica. ^[1]

Per savenn pussee, varda l'articol Anticiclon orografich.

I anticiclón hinn anca classificàa in anticiclon cald e anticiclon frècc a segonda che gh'abìen denter aria pussée calda o pussée frèccia de quèlla che la gh'è intorna.

In del center di anticiclón (ma anca di ciclon) a gh’è semper compresa de l’aria pussèe calda oppùr pussée frèggia de quèlla che la gh’è intorna. Al fin che l’anticlon el tenda a riforzàss a l’è important che l’aria calda la sia presenta a tutt i quòt (anticiclon cald). Se gh’hànn denter l’aria pussée calda a tutt a quòt, tenden a rinforzàss perché ind l’aria calda la pression la tend a sbassàss men in prèssa con la quòta che in quèlla frèggia (segond la formola ipsometrica). Se inscambi l’aria frèggia l’è presenta al soeul (anticiclon tèrmich) alora i struttur anticiclònic vegnen pussée debol a ‘ndà su con la quòta.

I anticiclon frègg se ingeneren semper quand che ‘l càpita on raffreddament di strat de aria arent al soeul (a hinn donca ciamàa anticiclon tèrmich). In quèll caso chì l’aria pussée frèccia l’è presenta domàa al soeul e de conseguenza l’anticiclon el ven pussée debol a ‘ndà su in quòta indoe la circolazion la diventa ciclònica. On esempi important de quèll tipo de anticiclon chì a l’è quèll che ‘l gh'è sora i pòli e poeu in quòta (sora i 3000-4000 meter) el se trasforma in del vòrtes polar. Minga domà cheeschì, ma generalment, tucc i anticiclon che se foeurmen sora i región frècc hinn de quèll tipo chì (per esempi l’Anticiclon russo e l’Anticilon euro-asiatich e gh’hànn sora ona cèrta quòta di center de bassa pression. Di anticiclon frègg se foeurmen anca a scala locàl, per esempi quèj che se formen de nòtt in su la tèrraferma quand che la ven pussée freggia rispètt al mar, o al contrari in di or dìurni in sul mar e hinn responsabil di bris de mar e de de tèrra. ^[2]

Ai anticiclon cald ghe partegnen sia on quaj anticiclon permanent che 'l se forma sora i zòn indoe la superfice terrèstra a l’è pussée calda (30-40° de Latitudin), ‘me per esempi l’Anticiclon di Azzorre o l’Anticiclon del Pacifich, sia tucc i anticiclon mòbil, ch’a hinn quèj che saren su ‘na faméja de front. ^[3] Intorna di anticiclon dinàmich se ingeneren de la vorticità di corrent discendent.^[4]

1. ↑ ^{1,0 1,1 1,2 1,3} Mario Giuliacci (2010). Manuale di meteorologia (in italian). Alpha Test, 210-212. ISBN 88-483-1168-7. 
2. ↑ Mario Giuliacci (2010). Manuale di meteorologia (in italian). Alpha Test, 216. ISBN 88-483-1168-7. 
3. ↑ Mario Giuliacci (2010). Manuale di meteorologia (in italian). Alpha Test, 217. ISBN 88-483-1168-7. 
4. ↑ Mario Giuliacci (2010). Manuale di meteorologia (in italian). Alpha Test, 344. ISBN 88-483-1168-7.