Fiteny frisiana

Ny fiteny frisiana na fiteny friziana na fiteny frisôna na fiteny frizôna dia fiteny jermanika maromaro ao amin' ny fianakaviam-piteny indô-eorôpeana. Ny fiteny frisiana andrefana dia tenenina any amin' ny tapany avaratr' i Nederlandy, indrindra ao amin' ny faritanin' i Fryslân (Frise amin' ny teny frantsay, na Friesland amin' ny teny anglisy), izay nisy mpiteny 467 000 teo ho eo tamin' ny taona 2001, nihena ho 350 000 teo ho eo izany tamin' ny taona 2021.

Ao amin' ny faritanin' i Fryslân dia ny 40% amin' ny mponina no miteny frisiana ao an-trano. Ny fiteny frisiana atsinanana dia tenenin' ny olona 1 000 tany Alemaina tamin' ny taona 2007 tany Saterland ary ny fiteny frisiana avaratra dia tenenin' ny olona miisa 10 000 tamin' ny taona 1976 tany Frisia Avaratra (Nordfriesland amin' ny teny alemana na Nordfraschlönj amin' ny teny frisianan' i Mooring). Ireo fiteny ireo sy ny fiteny anglisy ary ny fiteny skôtsy no sampana anglô-frisiana ao amin' ity vondrona ity. Mitovitovy amin' ny fiteny anglisy taloha izy ireo, na koa amin' ny fiteny neerlandey sy ny fiteny alemàna ambany.