Lokom-peo
.jpg)
Ny lokom-peo na lokon' ny feo na loko, amin' ny mozika, dia toetran' ny feo izay ahafaha-manavaka zavamaneno na olona samy hafa, na dia mitovy aza ny haavo sy ny hamafin' ny feo avoaka (maripeo na naoty mitovy). Anisan' ny toetra ara-pizikan' ny feo mamaritra ny fandrenesana ny lokon' ny feo ny vondron-katetika mamorona azy sy ny fiovana aorian' ny fanombohan' ny fahenoana ny feo.
Ny lokom-peo no mahatonga ny zavamaneno iray na ny olona iray hanana feo miavaka amin' ny an' ny hafa, na dia mitendry na mihira naoty iray mitovy aza. Ohatra, ny loko no tsy mampitovy ny feon' ny gitara sy ny an' ny pianô itendrena naoty mitovy amin' ny hamafy mitovy. Tsy misy mamalam-peo ireo zavamaneno roa ireo nefa rehefa tendrena amin' ny hamafy mitovy izy ireo dia mbola miavaka noho ny lokon' ny feony. Afaka manavaka ny zavamaneno samy hafa karazana araka ny lokom-peo isan-karazany ny mpitendry za-draharaha.
Afaka manova ny lokon' ny feo amin' ny hira hirainy na ny mozika tendreny ny mpihira sy ny mpitendry zavamaneno amin' ny alalan' ny fampiasana teknikam-pihirana na teknikam-pitendrena. Ohatra, afaka mampiasa fomba filalao samihafa na mitendry amin' ny faritra samihafa eo amin' ny tadin-dokanga ny mpitendry lokanga mba hahazoana loko samihafa (ohatra, ny filalaovana sul tasto dia miteraka loko mazava sy maivana, fa ny filalaovana sul ponticello kosa dia miteraka feo masiaka). Amin' ny gitara elektrika sy ny pianô elektrika dia afaka manova ny lokom-peo ny mpitendry amin' ny alalan' ny fitaovana fampifandanjana feo sy mpanova feo hafa.
Manomboka amin' ny fahazazana ka hatramin' ny fahalehibeazana dia miova ny lokon' ny feo rehefa mitombo ny taonan' ny olona. Mety hihabe na hikely izany, arakaraka ny olona. Ny fampiasana matetika ny feo dia mety hampiova ny lokony.