Cleopatra

Cleopatra VII Thea Philopator (koinēgreeksk: Κλεοπάτρα Θεά Φιλοπάτωρ let. ' Cleopatra vaderleevhebbende godinne'; 70/69 BC – 10. augustus 30 BC) was köäniginne van et ptolemaeiske Köäningryk Egypte van 51 töt 30 vöär Kristus, un de lätste echte heyrsker van et land. As lid van de ptolemaeiske geslachtslyne was see ne ofstammelinge van grundlegger Ptolemae I Soter, nen macedonisk-greeksken generaal un måt van Aleksander den Grouten. Nå et verstarven van Kleopatra wör Egypte ne provincy van et Romeinske Ryk. Dat was et ende van de lätste hellenistiske ståt in et middellandske sey-gebeed, seed et begün med Aleksander (336 - 323 vK). As eyrste språke küreden see koinegreeksk. See was de eanigste ptolemaeiske heyrsker wat egyptisk leyrden.

In 58 vK was Kleopatra med öär vader Ptolemae XII Auletes med in ballingskop in Rome, nå nen upstand in Egypte (domåls nen vasalståt van et Romeinske Ryk). Syn dochter Berenice IV pikkeden syne troune in. In 55 vK wör Berenice uut de tyd ehülpen, do as Ptolemae weaderümme küm når Egypte, med en romeinsk leager üm sik hen. Do as hee uut de tyd küm in 51 vK, wör de troune verdeyld oaver Kleopatra en syn bröder Ptolemae XIII. Mär dee kreagen et in et mot med mekander, wat uutlöyp up nen börgeroorlog. Et was rund de tyd at ståtsman Pompey up Egypte an vlüchteden ümdat den et in et mot had med den romeinsken diktator Julius Caesar. Pompey was altyd dikke möäge weasd med Ptolemae XII, mär den syn söäne Ptolemae XIII löät sik döär syne rådgeavers inflüsteren at et better was üm em uut de weg to rümen. Caesar küm Aleksandrie beleageren. Hee probeerden de beide sösken weader üm tåfel to krygen, mär Ptolemae synen höyvdrådgeaver Poteinos sea at Caesar Kleopatra vöärtröäk. Dårup löät Ptolemae et paleis wåras Kleopatra un Caesar satten beleageren. Caesar löät verstarking anhalen, wat de beleagering gauw to nen ende brachteden. Ptolemae XIII küm ümme by de Slag by den Nyl. Kleopatra syn halvsüster Arsinoe IX wör verbannen når Efesie ümdat see de beleagering medehülpen had. Caesar löät Kleopatra un nen anderen bröder, Ptolemae XIV, as samenheyrskers uutropen, mär lea et undertüsken med Kleopatra an. See kreagen nen söäne, Caesarion. As vasalköäniginne reisden Kleopatra in 46 un 44 vK når Rome, wåras see by Caesar in synen villa intröäk. Kort nå at Caesar ümmebracht wör un neet rap dårnå ouk Ptolemae XIV (up bestelling van Kleopatra), röäp see öären söäne Caesarion uut as medheyrsker, under den name Ptolemae XV.

In de Bevrydersoorlog van 43 töt 42 vK slöät Kleopatra sik an by et romeinske Tweyde Triumviraat, wår Caesar syn achterkleinneave un upvolger Oktaviaan, Mark-Anton un Mark-Emil Lepidus by warren. Do as se mekander in 41 vK tröffen in Tarsos, lea se et an med Anton. See kreag dree kinder med em. See vröäg em Arsinoe uut de weg to rümen, wat he dea. Anton wör voordan afhangeliker van Kleopatra vöär geld un militäre understöänige by syne veldtochten teagen et Partianenryk un et Köäningryk Armenie. De Skenkingen van Aleksandrie röpen öäre kinder uut as heyrskers under Anton syne triumvirale autoriteit. Underwyl skeidden Anton van Oktaviaan syn süster Oktavia Minor un trouwden med Kleopatra, wat den lätsten oorlog van de romeinske republik veroorsakeden. Oktaviaan begün ne lasterkampanje, dwüng Anton syne günstelingen in den romeinsken senaat üm hak-up to neamen uut Rome in 32 vK un verklården Kleopatra den oorlog. By den Slag van Actium in 31 vK wör den vloot van Anton un Kleopatra verslån, un Oktaviaan tröäk med en leager Egypte binnen in 30 vK. Dårby verslöög he Anton, den as selvmoard begüng. Do as Kleopatra höyrden at Oktaviaan van plan was üm öär as vangst in synen triomftocht döär Rome to paraderen, vergivtigden see sikselv.