Alejandro Valverde

Alejandro Valverde Belmonte (* 25. April 1980 in Las Lumbreras, Murcia) is en spaansch Radrennfohrer. To sien gröttste Erfolge tellen de Gewinn vun de Straatenweltmeesterschap 2018, de Gesamtsieg bi de Vuelta a España 2009 un veer Siege bi den Klassiker Lüttich-Bastogne-Lüttich. Wegen sien Bedeeligung in’n Dopingschandaal Fuentes wurr he 2010 för twee Johren sparrt.

Sien Profikarriere fung Valverde 2002 bi dat spaansch Radsportteam Kelme-Costa Blanca an. Een Johr later kunn he all twee Deelstreckensiege un den darten Platz in de Gesamtwertung bi de Vuelta a España recken. Bi de UCI-Straaten-Weltmeesterschapen 2003 in Hamilton keem he achter sien Landsmann Igor Astarloa up den tweeten Platz. 2004 wunn he bi verscheeden lütt spaansch Deelstreckenrennen, de Murcia-Rundfohrt, de Valencia-Rundfohrt un de Burgos-Rundfohrt, bi de he dree vun de veer Deelstrecken up sien Naam schrieven kunn. Bi de Spanien-Rundfohrt vun dit Johr, keem he, ofschons he bi de 11. Deelstreck swoor to Fall kommen weer, in de Gesamtwertung up den 4. Rang.^[1].

2005 is Valverde to de Mannschap Illes Balears wesselt, de en Lizenz as ProTeam in de nee schafft UCI ProTour kreeg. För dit Team hett he in dat Johr de Tour de France bestreeden, bi de he de Bargankunft vun de 10. Deelstreck in Courchevel in’n Tweeersprint vör Lance Armstrong wunn, aber up de 13. Deelstreck wegen Kneebeschwerden upgeven muss.^[2] In’n Harvst wurr Valverde bi de Straaten-Weltmeesterschapen achter Tom Boonen Viezweltmeester.^[3]

In dat folgend Johr kunn Valverde de Gesamtwertung vun de UCI ProTour winnen. To dissen Erfolg hemm insbesünnere sien Klassikersiege bi den Flèche Wallonne un Lüttich-Bastogne-Lüttich as ok de tweete Platz bi de Vuelta a España, bidragen. De Tour de France 2006 muss he aber all up de darte Deelstreck vun Esch-sur-Alzette nah Valkenburg nah en Stört rund 20 km vör dat Teel, bi den he sück dat Slötelbeen breeken dee, upgeeven. ^[4] To’n Saisonafsluss keem Valverde, de sien Ölkelnaam „Balaverde“ is, bi de Straaten-Weltmeesterschapen in Soltborg up den darten Platz.

Den Sieg in de Gesamtwertung vun de ProTour kunn Valverde 2008 nah Siegen bi Lüttich-Bastogne-Lüttich, dat Deelstreckenrennen Critérium du Dauphiné Libéré un de Clásica San Sebastián wedderhalen. Bi de Tour de France, de in dit Johr as ok de Vuelta a España nich to de ProTour hörrn dee, wunn he de eerste Deelstreck, un övernehm dormit dat Geel Trikot un wurrn an’n Enn Gesamtnegenter – Achter nah de nahderhen utspraaken Disqualifikatschoon vun Bernhard Kohl – un kunn dormit den sössten Rang ut dat Vörjohr nich ganz recken. Ok bi de tweet Deelstrecke vun de Spanienrundfahrt keem he up den eersten Platz. Tüschendör weer he sogor Gesamtführender bi dit Rennen un keem an’n Enn‘ up den fieften Platz.

Den bit dorhen göttsten Karriereerfolg reck Valverde mit den Gesamtsieg vun de Vuelta a España 2009, de he mit 55 Sekunnen Vörsprung för Samuel Sánchez wunn, nahdem he de Gesamtführung up de 9. Deelstrecke övernommen harr. He wunn dorbi woll nich een Deelstreck, geev dat Golden Trikot aber bit to de letzt Deelstreck in Madrid nich mehr af.

Nahdem all dat ehmalge Team vun Valverde Kelme (laater: Comunidad Valenciana) as ok wiedere ehmalge Fohrer vun dat Team as Óscar Sevilla, Santiago Botero un José Enrique Gutierrez in den Verdacht geraden weern, Blootdoping ünner de Leitung vun den Madrider Fruendokter Eufemiano Fuentes bedreeven to hemm, wurr an’n Dag vun dat afsluutend Tietfohren vun de Vuelta an‘n 16. September 2006 bekannt, dat ok Alejandro Valverde up de Dopinglist vun Fuentes stahn sull. Up en Dokument, dat in’n Rahmen vun de Huusdörsöken in den Dopingschandaal Fuentes in‘n Mai 2006 beslagnahmt wurrn weer, sall dat Kürzel „Valv. (Piti)“ stahn hemm, wobi „Piti“ de Naam vun Valverde sien Hund weer. Dat Dokument weer en Inholtsverteeken för en Köhlschapp, in dat Blootkonserven upbewohrt wurrn.^[5]

De Vorwürfe in de Süddeutschen Zeitung van‘n 19. Juni 2006 wurrn vun den spaanschen Radsportverband torüchwiest, aber in’n Mai 2007 sünd nauere Angaven un Dokumente updüükt.^[5] As Bewies hemm ok Blootproven deent, de Valverde nah de Teelpassage to’n Anlaat vun den Italienafsteeker up de 15. Deelstreck vun de Tour de France 2008 afnommen un mit dat Fuentes-Material vergleeker wurr. An‘n 11. Mai 2009 wurr Valverde vun dat Natschonale Olympisch Komitee vun Italien für twee Johren sparrt. Disse Straaf gull för alle Rennen up italieensch Bodden.^[6] Somit drüff he ok nich an de Tour de France 2009 deelnehmen, wiel ok de weer över italieensch Straaten führen dee.

Ok wenn he mit Hülp vun Afkaaten gegen dat Oordeel vör den Internatschonalen Sportgerichtshoff (CAS) angahn is, bleev dat dorbi, so dat he bit to’n 10. Mai 2011 för all italieensch Rennen spaart weer.^[7] An‘n 31. Mai 2010 hett de CAS rückwirkend van’n 1. Januar 2010 en tweejohrig Sparr gegen Valverde utspraaken. Dormit weer he bit to den 31. Dezember 2011 weltwiet sparrt.^[8]

Nah Afloop vun sien Dopingsparr hett Valverde glieks an sien bitherig Erfolge anknütt: He wunn bi de Straaten-Weltmeesterschapen 2020, 2013 un 2014 jewiels de Bronzemedaille. 2014 wunn he ok weer den Flèche Wallonne un de Clásica San Sebastián. Bi de Vuelta a España keem he 2012 up den tweeten Platz, 2013 un 2014 jewiels up den darten Platz. 2014 wunn he ok de Eenzelwertung vun de UCI WorldTour.2015 wunn he to’n darten Mal de Klassiker La Flèche Wallonne un Lüttich–Bastogne–Lüttich un bi de Tour de France keem he in de Gesamtwertung up den darten Platz un dormit eerstmals up dat Podium. De Eenzelwertung bi de UCI World Tour hett he sück 2015 ok weer haalt. 2016 wunn Valverde to’n veerten Mal un 2015 to’n fieften Mal Flèche Wallonne un is dormit unanfuchten Rekordsieger vun dit Rennen.

Eerstmalig nehm he 2016 an den Giro d’Italia deel. Hier keem he up den darten Platz mit blots 1:17 Minuten Rückstandup den Sieger Vincenzo Nibali. Dormit weer he bi all groot Lansdrundfohrten wenigstens eenmal up dat Podium.

2017 wun he in dat Fröhjohr de Vuelta a Murcia, de Gesamtwertung vun de Andalusien-Rundfohrt, de Katalonien-Rundfohrt un de Baskenland-Rundfohrt. To’n fieften Mal kunn he ok Flèche Wallonne up sien Naam schrieven, un en beten later to’n veerten Mal Lüttich–Bastogne–Lüttich, nahdem he in’n Teelhang en Angreep vun Daniel Martin kontert un hüm in’n Sprint slahn harr. De Spanier truck dormit mit Moreno Argentin mit veer Siegen gliek, blots Eddy Merckx wunn dat Rennen sogor fiegmal.^[9] An‘n 1. Juli 2017 is Valverde bi dat Eenzelrennen vun de Tour de France in Düsseldörp antreeden un is up de natt Straat över Kopp gahn. Dorbi hett he sück de Kneeschiev un dat linke Sprungbeen braken un harr ok doch en dee Snittwunn an dat Schienbeen. He wurr sofort ansluutend opereert.^[10][11]

2018 hett he de Gesamtwertung vun de Valencia-Rundfohrt, de Abu Dhabi Tour un de Katalonien-Rundfohrt up sien Naam schreeven. Bi den Flèche Wallonne wurr he achter Julian Alaphilippe Tweet. Bi de Vuelta vun dit Johr wunn he twee Deelstrecken un keem in de Gesa,twertung up den fievten Platz un wurr Sieger in de Punktewertung.

Nah insgesamt söss Podiumsplätzen bi Weltmeesterschapen wurr Alverde in Innsbruck eerstmals Straaten-Weltmeester, as he Romain Bardet, Michael Woods un Tom Dumoulin in’n Sprint vun de veerköppig Grupp, de sück in den letzten Anstieg billd harr, slahn kunn.^[12]

In‘n März 2019 hett Valverde mitdeelt, dat he sien endgültigen Rückträe vun den Radsport för 2021 planen dee, dat Johr nah de Olympisch Spelen in Tokio.^[13]

Alejandro Valverde. Mehr Biller, Videos oder Audiodateien to’t Thema gifft dat bi Wikimedia Commons.

• Alejandro Valverde in de Datenbank vun Radsportseiten.net
• Alejandro Valverde bi ProCyclingStats (engelsch)
• Alejandro Valverde in de Datenbank vun de Tour de France
• Alejandro Valverde in de Datenbank vun Sportsreference.com

1. ↑ radsport-news.com vom 15. September 2004: Valverde - die Knochen sind heil
2. ↑ radsport-news.com vom 15. Juli 2005: Dritter Etappensieg für McEwen
3. ↑ radsport-news.com vom 25. September 2005: Tom Boonen neuer Weltmeister
4. ↑ radsport-news.com vom 4. Juli 2006: Valverde nach Sturz draußen
5. ↑ ^{a b} sueddeutsche.de vom 7. Mai 2007: Der Nächste, bitte!
6. ↑ radsport-news.com vom 11. Mai 2009: CONI sperrt Valverde für zwei Jahre
7. ↑ radsport-news.com vom 16. März 2010: „CAS weist Valverdes Einspruch zurück“
8. ↑ Valverde suspended for two years world-wide, keeps results. In: cyclingnews.com. 31. Mai 2010, afropen an’n 21. Oktober 2018 (engelsch). 
9. ↑ Valverde wins fourth Liège-Bastogne-Liège. In: velonews.com. Afropen an’n 30. September 2019 (engelsch). 
10. ↑ Ibrahim Naber: Alejandro Valverde: Schwerer Sturz überschattet Start der Tour de France. In: welt.de. 1. Juli 2017, afropen an’n 2. Juli 2017. 
11. ↑ Sport1.de: Tour de France 2017: Die fünf Aufreger des Auftaktrennens. In: sport1.de. 1. Juli 2017, afropen an’n 2. Juli 2017. 
12. ↑ Endlich WM-Gold: Valverde am Ziel seiner Träume. In: radsport-news.com. 30. September 2018, afropen an’n 30. September 2018. 
13. ↑ Alejandro Valverde plans to retire in 2021: I will have to be home and enjoy the family. In: cyclingpub.com. 30. März 2019, afropen an’n 30. März 2019.