Donald Jackson (Ieskunstlöper)

Donald George Jackson, OC (* 2. April 1940 in Oshawa, Ontario) is en ehmalger kanaadasch Ieskunstlöper. He is in’t Eenzel start un weer 1962 Weltmeester.

De dreemalig kanaadsch Eenzelmeester keem bi sien eerst WM-Deelnahm 1957 up den 7. Platz. In de Johren 1959 un 1960 wurr he Viezweltmeester, 1959 achter David Jenkins un 1960 achter Alain Giletti. Bi de Olympisch Spelen 1960 in Squaw Valley wunn he de Bronzemedaille achter David Jenkins un Karol Divín.

Divín weer dat ok, de Jackson bi de Weltmeesterschap 1962 in Prag herutfordern dee. Nah dat Plichtprogramm führ Divín mit gooden Vörsprung. Um doch noch to winnen, muss Jackson in sien Kür dörgahns Hööchstnoten halen. Dat führ dorto, dat Donald Jackson an’n 15. März 1962 as eerst Ieskunstlöper en dreefack Lutz sprungen hett. So hett he sien Kür to de Musik van Carmen anfangen un kreeg ok dorüm de Hööchstnoten, de he bruuken dee, um Divín to överhalen un Weltmeester to wurrn (up den darten Platz keem de Franzoos Alain Calmat). Jackson weer de eerst kanaadsch Löper, de Weltmeester wurr.

Dornah hett he sien Amateurloopbahn afslooten un wurr Profi.

• Donald Jackson in de Datenbank van Sportsreference.com (engelsch)
• Offizielle Website, u. a. mit Levensloop un Biller (engelsch)