Rock independent

Lo rock independent (indie rock o indie en anglés) es una classificacion musicala qu'apareissèt a la fin deis ans 1970 au Reiaume Unit coma resultat dau trevirament ocasionat per l'aparicion dau movement punk. Lo tèrme si difusèt rapidament dins lo monde entier per designar lo rock distribuit independentament dei majors dau disque e que rèsta opausat ai corrents dominants dau rock.

Doncas la classificacion es pas purament musicala mai designa a l'origina de disques (e pas de gropes) publicats per de labèls "pichons". Fòrça gropes si qualifiquèron coma aquò (etimologicament a tòrt) de "rock independent" mentre que publican seis albums a dei majors. Pasmens per extension, la categoria "independent" s'utiliza mai encuei per qualificar un corrent relativament estendut, una estetica de la musica rock, que segon l'estatut contractuau dei gropes. Una constanta dei gropes de rock independent es la fidelitat a regard dei valors de l'underground, de la còntracultura e la recèrca d'un rock autentic, alunchat de l'estandard comerciau.

Leis expressions "rock independent" e "rock alternatiu" si diguèron indiferentament fins au començament deis ans 1990, moment que lo sens dau segond s'alarguèt considerablament per finir per englobar una part importanta de la produccion musicala rock, lo premier conservant son sens originau, mai restrenh mai que si duèrbe pauc a cha pauc a de movement mai experimentaus e, d'un biais contradictòri, de mens en mens rock. Coma aquò a l'ora d'ara, se d'un caire es costumier de considerar lo rock independent coma un sota-genre dau rock alternatiu, d'autre caire, ambé l'aparicion de movements aparentats coma lo post-rock per exemple, es egalament de mai en mai frequent de lo representar coma un movement que passa l'unica esfèra musicala dau rock per anar vèrs l'hip-hop, la musica electronica, o l'hardcore per exemple ; si parlarà coma aquò totjorn que mai de musicas independentas.