West Ham United F.C.

West Ham Nòm complet West Ham United Football Club Nòm d'afession Hammers, Irons Data ëd fondassion 1895 Color Ross e asur Stadi Boleyn Ground (35 647 pòst) Sede Pressident Björgólfur Guðmundsson Alenator Gianfranco Zola Sit an sla Ragnà www.whufc.com An ca Fòra ca Fòra ca 2

Ël West Ham United a l'é na società 'd fótbal ëd la Gran Brëtagna e, për esse pì precis, dël borgh londinèis ëd West Ham. A fa part ëd la Premier League anglèisa e a gieuga soe partìe antëcà ant ël Boleyn Ground, stadi che soens a ven ciamà Upton Park përchè cost a l'é'l nòm dla part ëd la sità andoa a resta.

Television e giornaj a ciamo ij giugador e ij tifos dël West Ham Hammers përchè l'ansëgna dla squadra a l'é fàita da doi martej ancrosià e a ciamo 'l club l'Academia dël fótbal përchè soe squadre 'd giovo a son sempre tra le mej, ma ai tifos a-j pias ëd pì dovré lë stranòm d'"Irons" përchè ël prim nòm ëd la squadra a l'era Thames Iron Work F.C.

Bele che ël West Ham a l'é mai stàit un club tra ij pì fòrt ëd la Premier League anglèisa (da già che mach dël 1985/86 a l'ha lotà për vagné 'l campionà), a l'ha squasi sempre giugà an serie A e a l'ha vagnà tre vire la FA Cup dël 1964, 1975 e dël 1980 e la Copa dle Cope dël 1964/65 an giugand peui n'àutra final dël 1975/76.

Dòp doi campionà giugà ant la sconda division (Football League Championship), ël West Ham a l'é rivà torna an serie A dël 2005/06.

L'ansëgna ofissial a rapresentava doi martej ancrosià, coj martej che as dòvro ant le fàbriche andoa as fan le nav. Dël 1900 a l'ansëgna a l'é giontasse un castel për rapresenté la "Green Street House", ciamà 'dcò Boleyn Castle përchè bele-lì a l'avìa vivù Ana Bolena. Ant l'ansëgna ël "Boleyn Castle" a lé butà darera ai doj martej e con l'imàgin ëd doe tor.

N'àutra teorìa a conta che 'l castel a l'é stàit giontà për ringrassié l'agiut che ij giugador dl'Old Castle Swift a l'han dàit al West Ham. Comsëssìa la presensa an soa ansëgna dël castel a l'ha portà la società a ciamé sò stadi Boleyn Ground.

Ël club a l'é stàit fondà da Arnold Hills, diretor dël cantié naval londinèis ëd Thames Ironworks, coma apàir organisà për ij sò ovrié. La squadra a l'ha partissipà a la "London League" che a l'ha vagnà dël 1898. L'ann dòp a l'ha partissipà a la Sconda Division dël Campionà dij semi-professionista dla Southern League an giugand le partìe an ca al Memorial Grounds, ant ël borgh ëd Canning Town. A costa mira për podèj partissipé al Campionà 'd prima division la società a l'ha avù da manca 'd fotbaleur professionista. Ël Thames Iron Works a l'é disparù dël giugn dël 1900 e dël luj dël midem ann a l'é nàit ël West Ham United F.C. An cola ocasion a son ëdcò decidusse ij color ëd la neuva società: ël bordò e l'asur.

Dël prim dë stèmber dël 1900 ël West Ham a l'ha giugà soa prima partìa antëcà anté che ij Hammers, dnans a 2.000 spetator a l'han vinciù 7 a 0 contra ël Gravesend mersì a le quatr grije ëd lë scossèis Billy Grassam, a le doe ëd Jimmy Reid e a la grija 'd Fergus Hunt.

Ël 2 dë stèmber dël 1904 ij Hammers a gieugo soa prima partìa al "The Castle", un camp antlora pen-a costruì e con l'intrada an Green Street, contrà prinsipal dël borgh d'Upton Park andoa ancora al dì d'ancheuj, ël West Ham a l'ha sò stadi. Ant ël neuv camp ël West Ham a l'ha vinciù contra 'l Millwall con tre grije 'd Billy Bridgeman.

Dël 1919 la Football League a l'ha ancaminà torna ij sò campionà dòp ij quatr ani 'd guèra dla prima guèra mondial e ël West Ham a partìssipa al Campionà dë Sconda Division për la stagion 1919/20.

Ël 30 d'agost dël 1919, ij Hammers a l'han ancaminà ël neuv torneo an giugand dnans a 20.000 spetator contra ël Lincol City. L'arzultà final a l'é stàit 1 a 1. A la fin ëd l'ann ij Hammers a son rivà ant la posission ch'a fa set ëd la classificassion. Con 21 grije, ël giugador pì prolìfich a l'é stàit Syd Puddefoot, ìdol dij tifos peui vendù al Falkirk scòssèis.

Ël 28 d'avril dël 1923 a j'ero 200.000 jë spetator rivà a lë stadi 'd Wembley për vëdde la final ëd F.A. cup (la prima giugà an col camp) trames ël West Ham e ël Bolton che a la fin a l'ha vagnà 'l trofeo con na vitoria për 2 a 0. Combin ch'a l'abia avù sta delusion ël West Ham a l'ha vinciù 'l campionà dë Sconda Division e an rivand parej an Prima Division.

Sempre dël 1923 ël West Ham a l'é stàita la prima squadra anglèisa a giughé na partìa da amis an Almagna dòp la prima guèra mondial.

La stòria dij Hammers an Prima Division a l'é ancaminà con un pari sensa grije sël camp dël Sunderland, na sman-a anans ëd vagné contra l'Arsenal 1 a 0 ant la prima partìa giugà antëcà dla stagion 1923/24. La prima esperiensa an "First Division" a l'é peui terminà dël 1931/32 con la degradassion.

Con la sconda guèra mondial la Football League a l'é torna fërmasse dal 1939 al 1946, agn anté che 'l West Ham a l'ha fàit vàire campionà regionaj e a l'ha vagnà la League War Cup an batend ant la final ël Blackburn 1 a 0.

La stagion 1956/57 a l'ha marcà l'ancamin dla gran tradission dël vivié dël West Ham. An efet la squadra dij giovo a l'é rivà a la final ëd la copa nassional dij giovo (FA Youth Cup) an perdend mach j'ùltime doe partìe contra ël Manchester United.

Dël 1957/58 la prima squadra a l'é riva torna an prima division an vagnand la Sconda Division con 101 grije an 42 partìe.

Ant la prima stagion an First Division, për esse pì precis l'8 dë stèmber dël 1958, a l'ha dësbutà an prima squadra Bobby Moore, ël giugador pì grand ant la stòria dël West Ham.

Ron Greenwood a l'é dventà l'antreneur dël West Ham ant l'istà dël 1961, dòp le dimission ëd sò predecessor Ted Fenton. Dël mars ëd l'ann sucessiv, Greenwood a l'ha catà dal Crystal Palace l'atacant John Byrne për 65.000 sterlin-e, antlora la gifra pì cara mai pagà an Gran Brëtagna për un giugador. Cost a l'era la preuva che 'l West Ham a l'era an camin ch'a provava a monté n'àutr ëscalin ëd la gerarchìa dël fótbal anglèis.

Ant la stagion 1963/64, con na squadra ch'a podìa fé fiusa an tanti giovo rivà dal vivié che n'ann anans a la finitiva a l'avìa vagnà la FA Youth Cup, ël West Ham a l'é rivà për la sconda vira 'd soa stòria a la final ëd la copa nassional contra 'l North Preston End. Ant na partìa rica dë spetàcol ij Hammers l'han armontà doe vòte 'l vantagi dël North Preston End e, quand nomach a mancavo 5 minute a la fin ëd la partìa, Ronnye Boyce a l'ha fàit la grija dla vitòria. Parej Bobby Moore a l'ha montà ij famos ëscalin ëd Wembley për andé a pijé coma capitani dij Hammers ël prim, amportant, trofeo ant la stòria dla società.

Costa sen-a a l'é arpetusse torna n'ann dòp, quand ël West Ham a l'é rivà a la final ëd la Copa dle Cope che l'é giugasse pròpi a Wembley. J'aversari j'ero j'alman dël Munich 1860 e ant ël teren ëd gieugh la veuja'd vagné a l'é stàita pì amportanta dla tàtica. Le doe grije d'Alan Sealey a l'han fàit cadò a la squadra dël East End londinèis ëd soa prima, e fin-a adess ùnica, copa europenga. Ant l'istà dël 1966, Bobby Moore a l'ha montà torna jé scalin ëd Wembley për la tersa vira an tre ani. L'ocasion a l'é 'l campionà dël mond che j'anglèis a l'han vagnà an final contra l'Almagna ant na partija motobin complicà e difìcil. Ij tifos dël West Ham a arcòrdo ancora sta partìa përchè a son stàit pròpi dij giugador Hammer a bate j'alman: Geoff Hurst con tre grije, Martin Peters con n'àutra grija e Bobby Moore che, coma capitani ëd la selession anglèisa, a l'é stàit festegià da tuti.

Dal 1966 ël West Ham United a l'é restà sempre a metà dla classificassion. Soens ij fotbaleur a son cangià e 'dcò ij tre che a l'han "vagnà" 'l mondial dël 1966 a son finì a giughé da n'àutra banda. A la fin ëd la stagione 1973/74, Greenwood a lassa sò pòst a un neuv antreneur che a l'é stàit sò assistent: parej John Lyall a l'é dventà "general manager" e pì tard a sarà peui antreneur ëd la selession anglèisa dal 1977 al 1982.

Ël neuv West Ham ëd Lyall a l'ha fàit un campionà motobin anònim ma a l'é rivà a la final ëd la F.A. Cup. Ant na final franch combatùa, ij Hammers a l'han giugà contra 'l Fulham anté che antlora Bobby Moore a fasìa da capitani: vitòria "hammer" për 2 a 0 con doe grije d'Alan Taylor. Dël 1975 ël West Ham a l'é rivà torna a la final ëd la Cope dle Cope giugasse a Brussel andoa j'Irons a son batù da l'Anderlecht për 4 a 2.

Dòp costa neuva época d'òr për la società a son rivà dj'ani gram fin-a a la degradassion ruvà a la fin dla stagion 1977/78. Ël West Ham a l'é restà an Sconda Division për tre ani anté che a l'é stàit la prima squadra ant la stòria dël fótbal anglèis a vagné la F.A. Cup an giugand ant la Sconda Division: ël 10 ëd magg dël 1980 ij hammers a l'han giugà la final ëd Wembley contra l'Arsenal, squadra ëd Prima Division che l'ann passà a l'avìo vagnà 'l trofeo. Mersì a la grija ëd Trevor Brooking l'Arsenal a l'é batù e ij Hammers a l'han vagnà la copa për la tersa vira ant la stòria dël club.

Ruvà torna an Prima Division, ël West Ham a l'ha fàit vàire stagion difìcij ma bon-e: dël 1984/85 la squadra a l'ha evità la degradassion nomach për doi pont ma l'agn sucessiv, mersì a le grije realisà dai doi atacant Tony Cottee e Frank McAvennie a l'ha combatù fin-a a la penùltima giornà për vagné'l tìtol. A la finitiva ij Hammers a son rivà ters darera al Liverpool campion euròpengh a l'Everton campion anglèis.

Peui për la mancansa ëd neuv fotbaleur la squadra a l'é pa confermasse a coj livej e dël 1988/89 ël West Ham a l'é tornà casca ant la Sconda Division e John Lyall a l'é stàit esonerà.

Ël pòst ëd Lyall a l'ha pijalo Lou Macari anans ëd la stagion 1989/90. Macari a l'ha lassà sò travaj ël 20 ëd fërvé dël 1990 e a sò pòst a l'é rivà l'ex-hammers Billy Bonds, già antreneur dij giovo dël West Ham, che ant soa prima stagion a l'é passà trames a 19 partìe sensa dërote. A l'ha fàit ruvé la squadra ant la sconda posission ëd la Sconda Division an portand-la parèj an Premier League. Peui però ant la stagion 1991/92 ël West Ham a l'ha nen podù combate a la pari e a l'ha finì 'l campionà ant l'ùltima posission. Ant l'istà dël 1992 Terence Brown a l'é dventà president dël West Ham e la squadra a l'ha sùbit conquistà la Premier League an rivand sconda ant ël campionà 1992/93. A la fin ëd la stagion ël pòst ëd Billy Bonds a ven pijà da Harry Redknapp, che da n'ann a col moment-lì a l'era stàit lë scond antreneur.

Le prime decision pijà da Harry Redknapp coma alenator dël West Ham a son ëstàite cola 'd sërne Frank Lampard Sr coma sgond antreneur e cola 'd caté torna l'atacant Tony Cotee da l'Everton. A l'ha catà 'dcò Don Hutchinson për ël sènter camp dal Liverpool e 'l difensor Julian Dicks. Ël West Ham a l'é salvasse torna dël 1994/95 e a l'ha giugà un ròl motobin amportant ant l'assegnament dël tìtol quand, ant l'ùltima giornà, a l'ha fàit un pari (1 a 1) antëcà con ël Manchester United an gavandje la possibilità 'd vagné sò ters tìtol an tre ani e a l'ha fane cadò al Blackburn.

Dël 1995/96 ël West Ham a l'é ruvà a la posission ch'a fa des e n'ann dòp a l'ha fàit na stagion pes, dzoratut për le compre sbalià 'd Florin Raducioiu e Paulo Futre. Për boneur Redknapp a l'ha savù sfruté al 100% j'àutri giugador e dzoratut mersì a le grije dla cobia John Hartson e Paul Kitson la squadra a l'é salvasse sensa patì tròp.

Dël 1997/98, j'irons a son rivà ant la posission ch'a fa eut ëd la classificassion dzoratut mersì a le bele partìe giugà a l'Upton Park: 13 vitòrie, 4 pari e nomach 2 dërote con 40 grije marcà. N'ann dòp a l'é andàita ancora mej: la squadra a l'é rivà quinta a dispet ëd vàire problema e dzoratut grassie a le prestassion dël neuv giugador Paolo Di Canio. Cola istà ël West Ham a l'ha conquistà la partissipassion a la Copa U.E.F.A. (an vagnand l'Intertoto an final contra ël Metz fransèis) ma a l'é andàit fòra già ant lë sgond torn contra la Steaua Bucarest.

Dòp d'ani modest, ant la stagion 2000/01 ël West Ham a l'ha finì 'l campionà ant la posission ch'a fa quìndes (pes prestassion ëd la squadra an Premier League) e na giornà anans ëd la fin dël campionà Redknapp a l'ha lassà sò pòst da antreneur dòp na rusa con ël president dzora le compre da fé al mërcà sucessiv.

An general as peul disse che Redknapp a l'avìa nen na gran tàtica ma a l'ha avù l'istess a difende la causa dël West Ham ant n'época anté che'l cit ëstadi a podìa nen eufre a la società la possibilità 'd rivalisé con ij club pì grand. La fòrsa pì granda 'd Redknapp a l'é sempre stàita cola 'd sërché al mërcà dij fótbaleur ëd giugador sotvalutà ma costa a l'é 'dcò stàita soa ruin-a quand ël president Brown a l'ha decidù ch'a vorìa pì nen ësgairé 'd sòld dòp le compre sbalià 'd Raducioiu e Futre. Për l'ùltima partìa dël campionà, ant la dërota sël camp dël Middlesbrough F.C. për 2 a 1, la squadra a l'é stàita guidà da Glenn Roeder.

Dël 2001/02 l'antreneur a l'é stàit ancora Glenn Roeder ëdcò se a pias nen ai giugador claret and blue e dzoratut a Paolo Di Canio che a l'ha criticalo sensa gena. La squadra a l'é partìa motobin pian e a l'ha terminà 'l campionà ant la posission ch'a fa set.

Ëdcò dël 2002/03 ël West Ham a l'ha ancaminà mal la stagion a la mira che la prima vitòria antëcà a l'é ruvà mach a gené contra'l Blackburn (2 a 1). La squadra a l'ha da combate për resté an Premier League e sò aversari a l'é dzoratut ël Bolton e 'dcò se ant j'ùltime quatr partìe ij hammers a l'han fàit 10 pont, ij 42 pont an classificassion a-j basto pa për salvesse. A l'é stàita la prima vira ant la stòria dla Premier che na squadra con pì 'd 40 pont a l'ha nen podù salvesse.

Con la degradassion la società a l'é obligà a vende vàire giugador e parèj fótbaleur coma Joe Cole e Glen Johnson a son andàit al Chelsea, j'atacant Jermaine Defoe e Frédéric Kanoute a son finì al Tottenham. Ëdcò Paolo Di Canio a l'ha preferì lassé la società për andé a la Lazio.

Ant la stagion 2003/04 ij hammers a l'han ancaminà 'l campionà dë Sgonda division mal e dòp tre partìe Glenn Roeder a ven cangià con Alan Pardew che a l'ha fàit soa prima partìa da antreneur ël 22 d'otóber dël 2003 con un pari antëcà contra 'l Nottingham Forest.

L'obietiv d'Alan Pardew a l'era col ëd porté la squadra an Premier League an doi ani. Ant la prima stagion Pardew a l'ha motobin travajà për adaté la squadra a soa tàtica. Ij hammers a l'han fini 'l campionà an quarta posission e a son qualificasse ai play-off. Ant la semifinal a l'han përdù 1 a 0 sël camp ëd l'Ipswich Town ma ant la partìa dl'artorn a Upton Park a l'han recuperà con na vitòria për 2 a 0. Ant la final dël 29 ëd magg dël 2004 ël West Ham a gieuga contra 'l Crystal Palace e për n'eror ëd sò portié dòp n'ora 'd gieugh ël Palace a l'ha vagnà la partìa e a l'ha otnù la promossion.

A dispet ëd j'amportante compre 'd Teddy Sheringham e Sergei Rebrov, ij giornaj e ij tifos a arpròcio la società e a fan capì 'd fé nen fiusa ant ël travaj d'Alan Pardew. An efet la squadra ant la stagion 2004/05 a l'é ruvà mach sesta ant la classificassion an argionzend ij play-off dzoratut mersì a le prestassion fàite ant ij mèis d'avril e magg: a la fin 12 pont a l'han dividù l'Ipswich Town, ters ant la classificassion, e torna aversari dij hammers ant la semifinal dij play-off. Ant l'andé a Upton Park la partìa a l'é finìa 2 a 2 ma ant l'artorn ël West Ham a l'ha giugà con decision an vagnand 2 a 0. Costa vira l'aversari ant la final a l'era ël North Preston End e la partija a l'é giugasse torna ant ël Millennium Stadium ëd Cardiff dël 30 ëd magg dël 2005: ij hammers a l'han vagnà 1 a 0 mersì a la grija 'd Bobby Zamora, che a l'ha fàit pòch an tuta la stagion ma a l'é stàit decisiv ant ij play-off con quatr grije.

• [1] (sit ofissial an sla ragnà)