Silvio Berlusconi

Custu artìculu est galu unu abbotzu. Lu podes modificare e fàghere mannu e pretzisu. Agiuda·si!

Silvio Berlusconi (Milano, 29 de cabudanni 1936 - Milano, 12 de làmpadas 2023) est istadu unu polìticu e imprendidore italianu.

In su 1975 at fundadu sa sotziedade finantziària Fininvest e in su 1993 sa sotziedade multimediale Mediaset. Fiat connotu puru comente Il Cavaliere ca l'ant dadu s'onorefitzèntzia de "Cavaliere del Lavoro" (Cavalieri de su tribàlliu).

In su 1994 at formadu su partidu polìticu de Forza Italia, chi at bìnchidu sas elessiones cuddu annu impare cun sa Lega Nord e su Movimentu Sotziale Italianu. Su partidu in 2008 est intradu a fàghere parte de su Popolo della libertà chi depiat èssere su partidu ùnicu de su tzentru-dereta italianu, ma s'est dissòlvidu in su 2013 pro torrare a fundare Forza Italia.

Berlusconi at tentu bator mandados de presidente de su Cossizu, su primu in sa XII legisladura (1994), duos consecutivos in sa XIV (2001-2005 e 2005-2006) e in sa XVI (2008-2011). Est su polìticu chi est abarradu in càrriga prus tempus e duos guvernos suos sunt istados sos prus longos in s'istòria de sa Repùblica Italiana.

In s'istòria sua de imprendidore e polìticu, at àpidu bantos e crìticas medas. Sos bantos abbaidaiant a sa carriera sua de imprendidore chi at fraigadu aziendas mannas e annoadoras e a su fatu chi apat frunidu un'alternativa polìtica a su guvernu de sos erederis de su Partidu Comunista Italianu a pustis chi s'istajone de Mani Pulite aiat sinnadu sa fine de sos partidos de su pustisgherra^[1]. Sas crìticas pertocaiant su cunflitu de interessu intre sas duas carrieras, cun s'acusa de s'èssere fatu lezes ad personam^[2], su manizu de sas finàntzias de s'istadu italianu chi nd'ant pesadu su dèpidu pùblicu^[3], sa vida privada irregulada chi nde podiant fàghere unu personazu fàtzile de ricatare^[4] e sos numerosos protzedimentos zudissiàrios. In su 2013 est istadu cundennadu a bator annos pro frode fiscale, abarrende a foras de su parlamentu pro sa prima borta in azumai binti annos^[5].

Torradu candidàbile in su 2018, l'ant elizidu a su parlamentu europeu in su 2019^[6] e a su senadu italianu in su 2022^[2].

In s'abrile de su 2023 at annuntziadu de èssere malàidu de leutzemia e est istadu ricoveradu in ispidale prus bortas, finas a sa morte sua su 12 de làmpadas de su matessi annu^[5].

1. ↑ gabriele.tanda, Berlusconi est mortu: corrutu a duas caras, in Limba Sarda 2.0, 13 làmpadas 2023. URL consultadu su 17 làmpadas 2023.
2. ↑ ^{2.0 2.1} (IT) Berlusconi all'attacco: "La libertà, in La Stampa, 10 trìulas 2010. URL consultadu su 12 làmpadas 2023.
3. ↑ (IT) https://facebook.com/fabio.chiusi.9, Debito pubblico: il record assoluto è di Berlusconi, in Valigia Blu. URL consultadu su 12 làmpadas 2023.
4. ↑ (IT) Ruby ter: soldi, foto e minacce, così Berlusconi si è scoperto ricattabile, in la Repubblica, 5 trìulas 2015. URL consultadu su 12 làmpadas 2023.
5. ↑ ^{5.0 5.1} (IT) Antonio Polito, Gli esordi, il momento-chiave, l’agonia finale: il racconto di una vita fuori dall’ordinario, in Corriere della Sera, 6 nadale 2023. URL consultadu su 12 làmpadas 2023.
6. ↑ (IT) Elezioni Europee, Berlusconi eletto con Forza Italia: di nuovo parlamentare a 5 anni dalla decadenza, in www.leggo.it, 27 maju 2019. URL consultadu su 12 làmpadas 2023.