Papa Paulo VI

Alizaliwa Concesio, kijiji cha wilaya ya Brescia, katika mkoa wa Lombardia (Italia Kaskazini), ambapo familia ya Montini ilikuwa na nyumba ya kufanyia likizo.

Wazazi wake, wakili Giorgio Montini na Giuditta Alghisi, walifunga ndoa mwaka 1895 wakazaa watoto watatu: Ludovico, aliyepata kuwa mbunge, Giovanni Battista mwenyewe, na Francesco, daktari.

Papa huyo alipozaliwa, baba yake alikuwa mkurugenzi wa gazeti la Kikatoliki "Il Cittadino di Brescia", halafu akawa mbunge.

Mwaka 1903 alianza masomo yake kwa Wajesuiti.

Mwaka 1907 alihiji Roma kwa mara ya kwanza pamoja na familia, ili kuonana na Papa Pius X, halafu akapewa sakramenti za ekaristi na Kipaimara.

Mwaka 1916 alimaliza sekondari akajiunga na seminari ya mji wake.

Tarehe 29 Mei 1920 alipewa upadrisho katika kanisa kuu la Brescia. Mwaka uleule akahamia Roma ili kusoma Sheria na Falsafa kwa wakati mmoja.

Mwaka 1923 alianza kuelekea diplomasia na kushirikiana na Ofisi za Papa, kwa agizo la Papa Pius XI. Baada ya kutumwa Warsav (Juni-Oktoba 1923), mwaka 1924 alipata digrii tatu.

Baada ya kutimiza majukumu mengine, tarehe 13 Desemba 1937 alichaguliwa kuwa makamu wa Katibu wa Kanisa, Eugenio Pacelli, ambaye mwaka 1939 alichaguliwa kuwa Papa Pius XII.

Alimuunga mkono katika jitihada zake za kuzuia vita na kurudisha amani na za kuokoa uhai wa Wayahudi (huko Roma 4.000 waliokolewa na Kanisa kutoka mikono ya Wafashisti).

Baada ya vita vikuu vya pili alijitahidi kuepusha Italia na ukomunisti.

Tarehe 1 Novemba 1954, alichaguliwa kuchunga Jimbo kuu la Milano akapewa daraja ya uaskofu tarehe 12 Desemba.

Huko alifaulu kuinua hali ya jimbo katika kipindi kigumu sana.

Baada ya kifo cha Pius XII, alichaguliwa badala yake, tarehe 28 Oktoba 1958, Papa Yohane XXIII, aliyemchagua kardinali wa kwanza kati ya wale aliowateua tarehe 15 Desemba 1958.

Chini ya Papa huyo, kardinali Montini alihusika sana na maandalizi ya Mtaguso wa pili wa Vatikano, hadi ulipofunguliwa tarehe 11 Oktoba 1962.

Mtaguso ulikatika tarehe 3 Juni 1963 kwa kifo cha Papa.

Mkutano wa makardinali ulichukua muda mfupi kumchagua Montini kuwa Papa, naye alijichagulia jina la Paulo VI, tarehe 21 Juni 1963.

Mbele ya mabadiliko ya harakaharaka ya ulimwengu, Paulo VI alishika msimamo wa kujadiliana na wote na kuelekeza mtaguso mkuu uendelee kwa msimamo huo.

Haikuwa rahisi kuimarisha Kanisa Katoliki katika mvutano uliojitokeza hasa baada ya mtaguso kati ya wasiokubali mabadiliko na waliotaka kubadili hata mambo ya msingi, lakini alifaulu kwa uvumilivu mkubwa.

Mtu mpole na wa aibu, mwenye elimu kubwa pamoja na maisha ya kiroho ya hali ya juu, alifungua kurasa mpya katika ekumeni, kama alipokubaliana na Patriarki Atenagora I wa Konstantinopoli kufuta hati za mwaka 1054 zilizotenganisha Wakatoliki na Waorthodoksi (1964).

Tarehe 14 Septemba 1965, alianzisha Sinodi ya Maaskofu na tarehe 8 Desemba 1965 alifunga rasmi mtaguso.

Paulo VI alikuwa Papa wa kwanza kusafiri kwa ndege akaenda mpaka nchi ya mbali, akiwa wa kwanza kwenda Israeli na kutembelea mabara yote.

Afya yake iliharibika haraka mwaka 1978 ambapo alifariki tarehe 6 Agosti saa 3:40 usiku huko Castel Gandolfo, akiacha wasia mzuri sana.

Kwa uamuzi wa Papa Yohane Paulo II, tarehe 11 Mei 1993, Kanisa la Roma lilifungua kesi ya kumtangaza mwenye heri na hatimaye mtakatifu.

Tarehe 20 Desemba 2012 Papa Benedikto XVI alipitisha uamuzi wa kukiri ushujaa wa maadili yote ya Paulo VI, ambaye hivyo alistahili kuitwa "venerabilis".

Baada ya kuthibitisha muujiza uliopatikana kwa maombezi yake, Papa Fransisko alimtangaza mwenye heri tarehe 19 Oktoba 2014 na baada ya muujiza wa pili alimtangaza mtakatifu tarehe 14 Oktoba 2018.

Mbali ya hati za mtaguso mkuu, Paulo VI alitoa nyaraka kuu saba:

• Ecclesiam Suam (6 Agosti 1964), kuhusu majadiliano ya wokovu na binadamu wote;
• Mense Maio (29 Aprili 1965), kuombea mtaguso na amani;
• Mysterium Fidei (3 Septemba 1965), kuhusu Ekaristi;
• Christi Matri (15 Septemba 1966), kumuomba Bikira Maria aombee amani duniani;
• Populorum Progressio (26 Machi 1967), kuhusu maendeleo ya mataifa;
• Sacerdotalis Caelibatus (24 Juni 1967), kuhusu useja wa mapadri;
• Humanae Vitae (25 Julai 1968), kuhusu ndoa na uzazi wa mpango.

• Watakatifu wa Agano la Kale
• Orodha ya Watakatifu Wakristo
• Orodha ya Watakatifu wa Afrika
• Orodha ya Watakatifu Wafransisko
• Orodha ya Mapapa

• Maisha na hati katika tovuti ya Vatikani
• [http://www.saintpetersbasilica.org/Grottoes/Paul%20VI/Tomb%20of%20Paul%20VI.htm Kuhusu kaburi lake
• Kutawazwa