Adad

Adad
Wigskrif: 𒀭𒅎
Assiriese soldate dra ’n standbeeld van Adad.
Soort god	Mesopotamies
God van	Die weer, storms, donder en reën
Tuiste	Hemel
Kultussentrum	Karkara
Simbool	Weerlig, bul, leeu
Ouers	Sin (Nanna) en Ningal
Sibbes	Utu, Inanna
Metgesel	Sjala
Kinders	Gibil (Gerra)

Adad in Akkadies, Isjkoer in Sumeries en Hadad in Aramees en Arabies is die name van die god van storms in die Akkadiese, Assiriese en Babiloniese panteon. Al drie word gewoonlik geskryf met die logogram ^DIM (wigskrif: 𒀭𒅎). In Akkadies is Adad ook bekend as Ramman ("Donderaar"). Ramman is voorheen verkeerdelik as ’n aparte god beskou.

Die Sumeriese Isjkoer verskyn op die lys gode wat by Fara ontdek is, maar was baie minder belangrik as wat die Akkadiese Adad later geword het, waarskynlik omdat reën en storms skaars is in Suid-Babilonië en landbou daar eerder steun op besproeiing. Verder het die gode Enlil en Ninoerta ook stormeienskappe, wat Isjkoer se belangrikheid verder ondermyn het. Hy word soms uitgebeeld as ’n assistent of metgesel van een van die ander twee.

In sommige geskrifte is Adad/Isjkoer die seun van die maangod Nanna/Sin en Ningal, en die broer van Utu/Sjamasj en Inanna/Isjtar. Hy is soms ook die seun van Enlil. Sy metgesel in die Sumeriese én Akkadiese mitologie is Sjala, ’n graangodin wat ander kere met die god Dagan verbind word. Die vuurgod Gibil (Gerra in Akkadies) is soms die seun van Isjkoer en Sjala.

Adad/Isjkoer se spesiale dier is die bul. Die Babiloniese kultussentrum vir die god was Karkara in die suide; sy hooftempel was E. Karkara; sy metgesel, Sjala, is in die tempel E. Doerkoe aanbid.

Die god verteenwoordig twee aspekte in himnes: aan die een kant is hy die god wat reën bring om die land vrugbaar te maak, en aan die ander kant bring hy storms wat verwoesting saai. Hy word uitgebeeld met ’n weerligstraal (soms in die vorm van ’n spies) in sy hand en in himnes oorheers sy somber eienskappe. Die verbintenis van hom met Sjamasj, die songod, vanweë hul natuuraspekte het daartoe gelei dat die eienskappe van ’n songod soms aan hom toegeskryf word.

• Hierdie artikel is vertaal uit die Engelse Wikipedia

• Antieke Mesopotamiese god en godinne: Isjkoer/Adad
• Britannica Online Encyclopedia
• "Gateways to Babylon": Adad/Rimon
• Mesopotamiese gode: Adad (Isjkoer)

• Wikimedia Commons het meer media in die kategorie Adad.