Kan ne titaketzat tik Nawat, yultuk nemi ne Nawat!
Ini semanaj muneshtijtuk se blog tik Nawat te uij itukay "Chachalaka" pal ne Nawataketzat wan ne mumachtianimet. Tik Chachalaka yawit nemit tajtajkwilul tekenhat pal kiane ne mumachtiat Nawat yawit welit kikwit ne Nawat pal ma panukan yek wan ma pakikan mumachtiat ne taketzalis.
Se tajkwilul tik ne periodicoj pal Kuskatan "Diario de Hoy" ina ka te tatka ipatiw tajtaketzalis ken ne Nawat, wan ina ka mas yek ma mikikan ne tajtaketzalis ijkiuni. Muchiwtuk wey kwalan wan kumunilis tik ne movimientoj pal kipalewia ne Nawataketzalis. Weli tikita tay nemit tajtaketzat ipanpa tik ne tepewa pal Ishkalamat Tikpalewikan ne taketzalis ("Salvemos el idioma náhuat").
Ini semanaj, ne tukniwan nemit tik Kuskatan yawit welit kitat ne peliculaj El Tigre y el Venado iwan ne Nawataketza pal Takupan (Tacuba) Marcelino Galicia wan Roberto Carlos Mendoza. Sergio Sibrián kichiwki ne peliculaj wan nemi tik Nawat wan Castillaj. Welit tikitat ne trailer ka nikan. Tata Marcelino yajki itan tal tik ne shiwit 2012; inat ka kipiatuya 104 shiwit. El Tigre y el Venado yawi muishpanua ijtik ne "festival ambulante" tik ne Cinepolis Multiplaza ne 17/5 ka 7 horaj ka teutak.
Ashan nemia ne Nawat tik ne itzawalamaw ne Fundación Rosalía de Castro, kan kichiwat festejar ini shiwit ne aniversarioj 150 pal ne achtu amat pal tajtakwikalis pal ne poetaj nacional pal Galicia. Tikitztiwita yewa tik YTN ini ume takwikalis, Niawa ajapan, niawa ijishat wan Ejejekat, ejejekatzitzin, pero ashan sejseuk yawit kitat wan yawit kimatit ka nemi ne Nawat (shikpachukan ini ijilpika pal ankitat ka né). (Fundación e Casa Museo Rosalía de Castro)
Tik Nawat nusan... tinemit!!
Ashan ne "Día Mundial de la Libertad de Prensa" ipal ne UNESCO. Muchiwki ne achtu tunal ijkiuni ashan senpual shiwit. Tejemet nusan tiknekit tikelnamikit ini tunal iwan YAJYANKWIK TIK NAWAT! Miak taketzalis Metzali te kipiat prensaj, wan uni kineki ina ka te kipiat inkupak (voz), te mukakit, te welit tanutzat. Sujsul yek ma kipiakan se prensaj pal welit inat ka yejemet nemit kenhayuk, mukakit, yujyultuk. Kiane tel, tejemet tinat iwan ne Nawat, wan ma muchi ne Metzali inakan kenha tik intaketzalis: Tinemit!
YSUES Radio Universitaria tik 660AM: "Cultura Latinoamericana" ne lujlunes ka 10 horaj ka peyna. Wejkatanutza: 2511-2020. Shiwi tuwan!
Curso de náhuat: Centro Cultural Ne Yawal (Av. Izalco casa 102A, Colonia Centroamérica), los sábados 9-11:30 am, $1 la sesión a partir del 11 de enero 2014. Niveles Básico y Avanzado. Tamachtiani: Werner Hernández.
Clases de náhuat (nivel básico): Escuela de Artes de la UES, los viernes 2-4 pm, $0.50 x clase. Cuando lleguen pregunten dónde es el salón o por Guishtemi (77132406).
Taller de náhuat. Centro de Artes Hermanos Aguilar. Sábados 3:00pm. Inicio: 6 de abril 2013. Info. tel. 2222-3418.
.jpg)
