Wn/ppl/Tejemet nusan tikpiat se tutaketzalis

Taketzalistal pal YTN

Nemi se tal tik ne Reinoj Senputzujtuk itukay Cymru (ken inat ne Cymraegtaketzat) ush Wales (ken inat tik Ingles) ush Gales (ken muilwiat tik Castillaj). Yejemet kipiat se intaketzalis: Cymraeg/Welsh/Galés. Yaja ken se Metzalitaketalis: ashan sejse shiwit, ne kukunet te welituyat taketzat intaketzalis tik ne tamachtiluyan, wan su yejemet kichiwat, ne tamachtiani kinwiteki. Ashan tea. Kipiat ajamat, radioj wan television; ne kukunet mumachtiat ne taketzalis. Pero sujsul miak semaya welit Ingles, wan ne Cymraegtaketzat kenhayuk musumat pal te miki tay inpal.

Se yejemet se siwat itukay Elin Haf Gruffydd Jones. Elin tamachtia tik ne weytamachtiluyan tik se techan itukay Aberystwyth, wan yaja nusan ne tatuktiani pal ne organizacion itukay Mercator pal ne tajtaketzalis “chikitik” ipal Ewropa. Elin weli ankakeski taketzalis. Tik ini tajkwilul yaja techilwia ken mumachtij ukse “taketzalis chikitik” pal Ewropa, ne Euskara ush Vasco. Ne itajkwilul weli muita tik Cymraeg tik se blog (shikitakan katani). Tejemet tikpatatiwit tik Nawat pal muchi welit tiamatachiat...

Nipejki nimumachtia Euskara ashan senpual shiwit, kwak nikpiatuya 21 shiwit. Ninemituya nimumachtia Frances wan Castillaj tik ne weytamachtiluyan wan nikpishki chancej pal niaw ka clajclasej ka tayua pal nimumachtia Euskara tik ne techan kan ninemituya.

Taika nipejki nimumachetia Euskara? Pal tipewat nugustoj ne culturaj ipal España, pero ne wey taika, yaja ka ne Vascojmet kipiat se “taketzalis chikitik”, wan tejemet nusan tikpiat se taketzalis ijkiuni, wan yajika nikchiwki sentir ka tikenhat. Ika yejemet wan tejemet, muchi titasumat pal tikpalewiat ne taketzalis pal tutejtechan - muchi ne tujtunal wan nujme kwak tikejekuat titaketzat tik tutaketzalis, wan nusan ken tejtechan tik ne “tasumalis wey” ipanpa tay tupal, ika tiktasujtat, wan ipanpa muchi tay kineki ina tupal ken tejtechan.

Kwak tipashaluat tik tepal tal iwan ukse taketzalis, seuseujti uij ma tinakakan yek iwan ne chanejket. Pero te senpa ijkiuni! Se machiut (ejemploj): kwak nikilwia katka se yejemet: “Tejemet nusan tikpiat se tutaketzalis”, tapui se tenkal ijtik tejemet nemanha. Yejemet kimatit ka tikpiat se experienciaj kenha ken yejemet wan welit tinat ka “timuishmatit”.

Kwak panuk se shiwit wan nimumachtijtuyaya chiupichin Euskara, niajki ka Euskal Herria pal nipanu se metzti tik se tamachtiluyan pal nimumachtia mas. Uni tamachtiluyan nemik tik se techan chikitik, muchi tikuchit ka ne, timumachtiat ka tapuyawa, tipashaluat tik ne techan ka teutak, tikmanat tutakwal wan tisentakwat, titakwikat wan tisenpajpakit. Wan senpa titaketzat Euskara. Nusan kwak tikalakit tik se tiendaj tik ne techan pal tikuat se, techishmatket wan kimatket ka tuwan nemit pal tanutzat tik Euskara melka uij tupal ika timumachtianimet. Tinemituyat 50 mumachtiani!

Ashan weli nitaketza yek. Kwak weli, nimukwepa niaw nipashalua ka ne pal te nikelkawa. Kwak nipejki nimumachtia, te nikmatki ka niaw nikwi uni tay nimumachtij ijtik nutekiw nian ka niaw nikishmati miak takat wan siwat ika niweli ne taketzalis.

Kwak nikishmati se yankwik, wan titajtaketzat, tik se momentoj senpa nitami nina: “Guk ere gure hizkuntza daukagu”. Tik Cymraegtaketzalis yaja: “Mae gennym ni hefyd ein iaith ein hunain”. “Tejemet nusan tikpiat se tutaketzalis”. Nina uni, wan ken su inaskiat: "Ashan nikmati"... Sujsul nipaki ika nimumachtij ne Euskara. Su te nikchiwtuskia uni, te naja, wan te niweliskia nina: Elin ydw i. Ni Elin naiz. Naja ni Elin.

• [1] (Blog tik Cymraegtaketzalis "Y Wers")

Tikpia se pal tikneshtia? Shikpachu "Editar"! (Pal tikmati chiupiuk...)