Ingelmunster

Dit artikel is gesjreve (of begós) in 't Mestreechs. Laes hie wie v'r mit de versjillende saorte Limburgs ómgaon.

Ingelmunster mèt deilgemeintes en aongrenzende (deil)gemeintes (zuug de hoofteks veur 'n verklaoring).

Ingelmunster is e dörp en 'n gemeinte in de Belzje provincie Wes-Vlaandere, in 't arrondissemint Roeselare. De gemeinte heet 'n oppervlak vaan 16,16 km² en had op 1 januari 2008 10.620 inwoeners.

Geografie

Ingelmunster heet gein deilgemeintes en gein aander kerne.

Aongrenzende (deil)gemeintes

a. Izegem (stad Izegem)
b. Emelgem (stad Izegem)
c. Meulebeke (gemeinte Meulebeke)

d. Oostrozebeke (gemeinte Oostrozebeke)
e. Hulste (stad Harelbeke)
f. Lendelede (gemeente Lendelede)

Historie

Ingelmunster is geneump nao 't kloester wat hei in de vreug middeliewe stoont. De naom moot weure oetgelag es "Ingels monasterium" (de monneke waore Britte) of "ingelekloester". Graof Robrecht de Fries vaan Vlaondere leet roond 1075 op de rewiene vaan dat kloester es kestiel bouwe, wat de basis woort veur 't huieg Kestiel Ingelmunster (zuug foto). 't Dörp bleujde op door zien ligking tösse Brugge en Kortrijk. In 1297 kaom de Franse keuning Filips de Sjoene logere op 't kestiel in 't kader vaan zien campagne um de stad Brugge tot betaoling te dwinge. In 1580 voont hei de Slaag bij Ingelmunster plaots, wie militante Hugenote in opstand kaome tege de machhöbbers in de Spaonse Nederlen.