In The Hollies Style

In The Hollies Style er det andre studioalbumet til den britiske beatgruppa The Hollies, gjeven ut på Parlophone i november 1964.^[1] Albumet vart seinare gjeven ut i Canada av Capitol Records den 4. oktober 1965 med eit anna innhald.^[2]

På grunn av det dårlege salet av stereoutgåva av debutalbumet deira i Storbritannia vart In The Hollies Style berre utgjeve i mono, medan stereomiksane vart sende til andre marknader. Stereomiksen vart omsider gjeven ut i Storbritannia i 1967, men då under namnet The Vintage Hollies i 1967. I 1997 gav britiske EMI ut både mono- og stereomiksane på same CD.

Som føregangaren, Stay with The Hollies, vart In The Hollies Style spelt inn i EMI Studios i Abbey Road i London, og vart produsert av Ron Richards. Innspelinga av albumet byrja 13. april 1964 då bandet spelte inn songane «Time for Love» og «Don't You Know». Innspelinga fortsette den 27. april med «You'll Be Mine», «It's in Her Kiss», «Come on Home», «Too Much Monkey Business» og «I Thought of You Last Night». Tre songar til, den seinare B-sida «Come on Back», «Set Me Free» og «Please Don't Feel Too Bad» vart spelte inn 30. juni.

Gruppa var så ikkje i studi på nesten to månader, og kom attende 16. august for å spele inn «What Kind of Boy» og eit forsøk på singelen «We're Through». Dei var ikkje nøgd med arrangementet frå denne innspelinga og spelte inn «We're Through» på ny 25. august, då dei to siste songane på albumet vart spelte inn, «To You My Love» og opningsmedleyen «Nitty Gritty/Something's Got a Hold on Me».^[3]

Både dette albumet og debutalbumet inneheldt mange rhythm and blues-songar av amerikanske artistar og låtskrivarar, som Chuck Berry og Etta James. Men i motsetnad til debutalbumet, var det òg fleire songar som var skrivne av bandet sjølv. Sju av tolv songar på albumet var skrivne av Allan Clarke, Tony Hicks og Graham Nash og vart tilskriven pseudonymet «L. Ransford». Clarke, Hicks og Nash fortsette å brukte dette pseudonymet fram til albumet For Certain Because mot slutten av 1966, då songane til gruppa byrja å bli hittar.^[4]

Sjølv om The Hollies hadde blitt store stjerner i Storbritannia, valde verken det amerikanske eller kanadiske selskapet å gje ut dette albumet. Omsider, etter at det tredje britiske albumet, Hollies, kom ut, gav Capitol Canada ut albumet i ein litt endra versjon den 4. oktober 1965. Den kanadiske versjonen inneheld berre fem av songane frå den britiske utgåva, og tok i staden med tre av britiske hitsinglar som ikkje kom med på det britiske albumet («We're Through», «Yes I Will» og «I'm Alive»), to B-sides («You Know He Did» og «Come on Back», som sidan vart omskriven som «Stop Stop Stop»),^[4] ein song frå Hollies («Mickey's Monkey») og ei annan song spelt inn for, men ikkje teken med på Hollies («Honey and Wine»).

Totalt inneheldt den kanadiske versjonen seks songar skrivne av Clarke-Hicks-Nash og tilskriven L. Ransford, ein song mindre enn på den britiske utgåva. I alt vart ti forskjellige, originale songar gjevne ut på desse to versjonane av albumet.

The Hollies

• Allan Clarke – vokal
• Tony Hicks – sologitar, vokal
• Graham Nash – rytmegitar, vokal
• Eric Haydock – bassgitar
• Bobby Elliott – trommer, perkusjon

Andre medverkande

• Ron Richards – produsent